Manchester City-in dan bawhchhiatna (guilty verdict) lian tak an neih avangin Premier League-ah nghawng lian tak a thlen mek a. Inelna aṭanga hnawhchhuah emaw hremna khauh tak pek an nih theih thlengin ngaihtuah a ni a, Manchester United telin club hrang hrangte pawhin dan lama hma lak an rilruk mek bawk a ni.

Kum 2008-a Sheikh Mansour-a'n City a leina aṭang khan khawvel football a thlak danglam hle a. Mahse, kum 2009 aṭanga tun thleng hian City-a match result zawng zawng hi Premier League khawvel aṭangin thaibo (erased) ta se, an elpui lian Manchester United hian Premier League title engzat nge an lak belh ang tih hi mi tam tak zawhna a ni.

Data hmanga chhut nawnna (recalculation) aṭanga a lan danin:

◉ 2009/10: United hi Chelsea dawtah pahnihna an ni reng ang. Mahse City hi awm lo se, Carlos Tevez-a'n Old Trafford a chhuahsan lo ang a, hemi hian title a thleng danglam maithei a ni.

◉ 2010/11: Sir Alex Ferguson-a naute an champion reng ang a, pahnihna Chelsea aiin point 9-in an sang zawk ang.

◉ 2011/12: Sergio Aguero-a goal khung thut 'Aguero moment' kha a awm dawn lo! Man Utd hi Premier League champion an ni ang a, pahnihna Arsenal aiin point 18 ngawtin an chungnung zawk ang.

◉ 2012/13: Sir Alex-a season hnuhnung berah United hian Chelsea aia point 12-a tam hmuin title an la tho ang.

◉ 2013/14: David Moyes-a hnuaiah United hi 7-na ni lovin 6-na an ni ang a, Europa League (UEFA Cup) khel turin an tling ang. City laka 4-1 leh 3-0 a an tlawmna kha a awm loh chuan Moyes hian a hna a chan lo maithei bawk.

◉ 2014/15 & 2015/16: Louis van Gaal-a hnuaiah 2015-ah pathumna an ni ang a, 2016-ah goal difference-a Champions League thleng lo ta lo khan hmun ṭha zawk changin Van Gaal hian a hna a hum zui maithei a ni.

◉ 2017/18: Jose Mourinho-a'n Premier League nomawi a chawi ngei ang! United hian Tottenham aia point khat a tam hmuin an champion ang a, Mourinho-a'n "Medal leh win bonus ka phu" a lo tih tawh ṭhin pawh a thleng dik ang.

◉ 2020/21: Ole Gunnar Solskjaer-a hnuaiah United hi Liverpool aia point 5-a sangin Premier League champion an ni leh ang!

◉ 2022/23: Erik ten Hag-a hnuaiah pathumna ni lovin Arsenal dawtah pahnihna an ni ang.

Hetiang hian City-a result-te hi paih daih nise chuan, Sir Alex Ferguson-a chawlh hnuah pawh Manchester United hian Premier League title ṭha tak tak vawi thum lai (2012, 2018, 2021) an la belh thei dawn a ni. Premier League board-in City chungchangah thutlukna khauh tak an lak ngei beisei a ni a, a hnu zel a taka thil thleng tur erawh chhuichhuah a la ni rih lo.