UEFA Nations League-ah Portugal chuan an hlawhtlinna chhunzawm zelin, Denmark chu 4-2 in an hneh a. He inkhelah hian Manchester United star hlui Cristiano Ronaldo chu tel lovin, ram tana a match khelh hmasa bera bench-a dah a nih hnua manager Jorge Jesus-a thuchhuah avanga lungawilova camp chhuahsantu kum 41 mi hi a inlan lo a ni.
Roberto Martinez-a'n 2026 World Cup quarter-final a thlenpui hnua kumin nipuia Portugal enkawltu atana ruat Jorge Jesus chuan, Ronaldo awm loh hlan hian Manchester United captain Bruno Fernandes chu captain armband a hlantir a. Norway laka an chak ṭuma hliam tenau nei Fernandes hi United fan-te chuan Carrington lama kir leh tura an duh laiin, Jesus chuan squad-ah a chelh tlat a, Denmark lakah hian bul a ṭantir zui ta a ni.
Carrick-a hnuaia United tana a khelh ṭhin dan ang chiahin Fernandes hi number 10 position-ah a inlan a. Denmark-in an siphurh an sut hnu minute hnih lekah, Fernandes-a ball pek ṭha zet chu Goncalo Ramos chuan mawi takin a pet lut a, Portugal hian 2-1 in hma an hruai phah a ni.
Second-half ṭan tir lamah Fernandes hian goal khungna hun ṭha a neih chu Denmark goalkeeper Florian Wiegele chuan a lo dansak a. Hemi hnu lawk hian United striker hlui Rasmus Hojlund chuan Diego Costa khum zovin mawi takin goal a khung a, 2-2 a ni ve leh nghal a ni.
Mahse minute 67-naah Fernandes bawk a rawn langsar leh a, a cross ṭha tak chu Vitinha chuan tauh lutin ram tana a goal hmasaber a khung a, Portugal hian 3-2 in hma an hruai leh ta a ni. Fernandes hian he match-ah hian assist vawi hnih a nei a, inkhel pawh a thunun hneh hle.
Darkar khat khelh a nih hnuah United right-back Diogo Dalot chu substitute-in a rawn lut a. Tlarhnung venhim kawnga a thawh ṭhat hnuah, inkhelh tawp dawn lamah mual dinglam aṭanga a tlan luhpui chu Joao Felix hnenah a pe (assist) a, Felix hian goal khungin 4-2 in hnehna an chang ta a ni.
He inkhelah hian United player pahnih Fernandes leh Dalot te aṭangin assist vawi thum lai a rawn chhuak a. Portugal hian Pathianni hian Norway an hmachhawn leh dawn a, match li a zawnin hnehna chan an tum dawn a ni.
