Manchester United chuan Luke Shaw-a thlaktu tur leh a chhawmdawltu tur left-back zawn hna an chhunzawm zel a, RB Leipzig captain David Raum chuan January transfer window-a Old Trafford pan a inhuam thu a tarlan hnuah Red Devils hian chanchin lawmawm tak an dawng ta a ni.

Nipui transfer bazar chhung khan United neitu INEOS chuan Shaw-a aiawh thei tur defender lakluh an lo tum tawh a. Shaw hi season liam ta khan Premier League match zawng zawngah a bul ṭan vek mah se, a hliam ngun lutuk hi club hotute tan buaina lian tak a ni char char. Tun season inṭan hnuah pawh match vawi thum ngawt hliam vangin a hmaih leh tawh a, hei hian summer-a squad thuamchak duh em em tu head coach Michael Carrick a tiangaihna lo hle a ni.

A tirah chuan Newcastle United defender Lewis Hall chu an target ber ni mah se, midfield thuamchakna tura hma an lak muan deuh avangin Newcastle hian an player hi hralh an tum ta lo a. Barcelona rawlthar Alejandro Balde pawh lakluh tumin hma an lo la hman a, mahse Spanish defender hian Camp Nou-a cham chhunzawm a thlan bakah Barca lamin loan-a chhuah an phal loh avangin inremna a puitling thei lo a ni.

Heng thil thleng avang hian United hian Leipzig star David Raum lamah an mit an len leh ta a. Kum 28 mi German international hian Germany-ah a contract kum hnuhnung ber a hmang mek a, chona thar hmachhawn a chak tawh hle. TEAMtalk-in a tarlan danin, Raum hian January transfer window-ah Old Trafford zawm tura inpeih a nih thu green light a pe tawh a ni.

Leipzig sporting director Marcel Schäfer chuan Raum leh a aiawhtute nen contract thar chungchang sawiho an tum thu leh he player hi a thlawna chhuah zalen an duh loh thu a nemnghet a. Mahse, contract thar a ziah loh chuan a thlawna a chhuah mai lohnan Leipzig hian January-ah a man zangkhai zawka hralh an thlang tawh maithei a ni.

United hian Italian club lian Juventus te chu Raum lakluh tumnaah hian khingpui lian ber atan an nei a. Mahse, Premier League pan hi Raum-a duh ber a nih avangin United hian hma an hruai mekin a lang. Raum-a man hi £30million vel atana chhut a ni a.

Noussair Mazraoui leh Patrick Dorgu te hliam avanga an chawlh bakah Shaw-a dinhmun a chiang lo zel nen, United hian January-a pre-contract siampui mai lovin, he winter transfer-ah ngei hian a ngheta lakluh mai an rilruk mek a ni. Hemi rual hian naupang theihna ngah Harry Amass pawh a contract-a pawhsei theihna clause hmangin squad-ah an chhaih nghet chhunzawm bawk ang.