Manchester United leh England legend Wayne Rooney leh a nupui Coleen Rooney te chuan, an fapa naupang ber kum 8 mi Cass chu Premier League club Everton academy aṭanga an chhuah tir (release) ṭuma an hun tawn hrehawm tak chu an sawi chhuak ta.

Rooney leh Coleen te hian fapa pali—Kai, Klay, Kit leh Cass te an nei a. An fapa upa ber kum 16 mi Kai chuan Manchester United under-18 tan khel ṭha chho hlein scholarship a dawng a, kumin tir lam khan FA Youth Cup-a Derby County an hmachhawn ṭumin Old Trafford-ah a vawi khat nan a inlan tawh bawk a ni. A nau kum 13 mi Klay pawh United academy huangchhungah a awm mek bawk.

Mahse, an fapa naupang ber Cass erawh Everton academy-in an chhuah tir tak avangin rilru na takin a ṭap chhuak hial a ni. England striker hlui Peter Crouch leh a nupui Abbey Clancy te podcast, 'Therapy Crouch'-a an inlan tumin Wayne leh Coleen te hian an fapa thil tawn hi an sawi chhuak a ni.

Coleen chuan thil thleng chu sawiin, "Kan naupang ber chu an chhuah tir a, kha kha thil harsa ber a ni. A u pahnihte chu United-ah an awm char char a, Cass erawh Everton-ah a awm thung. Under-7 huang chauh a la ni a, Everton tantu ruh tak niin season ticket a nei bawk a, Everton-a a awm theih kha a tan chuan engkim a ni mai. Squad a len em avangin under-9 a luh dawn hian contract an ziak chauh ṭhin a, Cass hi an zingah a chak ber pawl a nih loh avangin an kawl chhunzawm dawn lo tih kan hre lawk a, phone call kan dawn ni chu a lo thleng ta ngei a ni," tiin a sawi.

Coleen chuan sawi zawmin, "Wayne chu phone-in a hrilh turin ka ti a, mahse Wayne lo thlen hmain Cass chu inah amah chiahin a lo awm a. 'Cass, phone call ka dawng a, Everton-ah season leh chu i kal tawh dawn lo a ni' tiin ka hrilh a. A lu dawmin a ṭap chhuak nghal rawng rawng a. Mahse darkar khat hnu lekah chuan a theihnghilh leh mai a, a tha leh vek tawh. Tualchhung grassroots team-ah a la khel chhunzawm zel a, ka nu leh pate phone-in, 'Everton-in min chhuah tir' tiin a hrilh nghal zat a ni," a ti.

An fapa chanchin an hmachhawn dan chungchang an zawhna chu chhangin Wayne Rooney chuan, "Engkim hi han ngaihtuah la, sikulah pawh pawl sang zawk leh thiam zawk an awm a, hei chu nunphung pangngai a ni ve hrim hrim. Football-ah pawh Man United, Everton emaw Liverpool-a tling zo ta lo player tam tak kan khelhpui tawh a, mahse hmun dangah kalin an khel chhunzawm a, career tha tak din theihna hun remchang a la awm vek a ni," a ti.

Kum 40 mi Wayne chuan sawi chhunzawmin, "An la naupang em em a ni tih kan theihnghilh ṭhin. Cass hnenah pawh, 'Kei pawh kum 9 ka nih hma chu Everton academy-ah ka lut bik hleinem, hun i la ngah lutuk. Football hi hlim takin khel phawt la, hun tha chu a la rawn thleng ve mai ang' tiin ka hrilh a ni," a ti bawk.

United legend ni mah se, Rooney hian a hming chhawm vang mai maia a faten duhsakna bik an dawn a duh loh thu a sawi chiang hle. Kai-a chungchang sawiin, "Ka hming vang maia scholarship emaw contract emaw a hmuh hi ka duh miah lo. Kai hian a theihna hmanga ama pual sulhnu din a duh a, ka theihtawpin ka thlawp ang. A theihna vang liau liau a nih ka duh a, scholarship a hmuh theih avang hian ka chhuang takzet a ni," a ti.

Wayne leh Coleen te hian Disney+ series thar 'The Real Rooneys'-ah an chhungkaw nitin khawsak dan chu mipui hmuh theihin an pho lang chho mek bawk a ni.