Denmark tana Nations League match a khelh laia Manchester United defender Patrick Dorgu a inhliam tak avangin, United chuan hliam vanga harsatna thar an tawk leh ta. Tun dinhmunah hian international break a la kal mek a, United hian Premier League khel leh turin hun eng emaw chen an la nghah a ngai dawn a ni.
Pathianni zan khan Denmark leh Wales ten Nations League match an khelh ṭumin, Dorgu hi bul ṭantu zingah a tel a. Mahse inkhel ṭan aṭanga darkar chanve (minute 30) chauh a liam tihin lakchhuah a ngai ta mai a ni. United wing-back hian a malpui veilam dawmin khelmual chhungah a let reng a, enkawlna a dawn hnuah manager Brian Riemer chuan a la chhuak ta nge nge a ni.
Hetianga lakchhuah a nih tak avang hian Dorgu hian hliam a tuar ngei nia ngaih a ni a, Denmark squad chhuahsana United lama kir tura beisei a ni ta bawk. Danish chanchinbu TV2 tarlan danin, kum 21 mi Dorgu hi a hliam dinhmun enfiah turin Manchester United lamah a kir dawn a, international break chhunga Denmark match hnih la hmabakah a inlan thei tawh dawn lo a ni.
Denmark manager Brian Riemer chuan hetianga hliam vanga player an inhloh hnem lutuk chu a ngaihna a hriat loh thu sawiin, Dorgu-a thlaktu tur a zawn a ngaih thu a sawi. Riemer chuan, "Hetiang thil hi ka la tawng ngai miah lo. Vawiinah player ṭha tak dang pakhatin min chhuahsan leh ta. Ka chhut a, vawiin hma pawh khan squad-a mi 23 awm ṭhin zinga mi pasarih emaw pariat emaw lai an kim lo tawh a, hetah an awm lo. In lamah an haw a nih loh pawhin an rawn kal thei lo hrim hrim a ni. Chutih laiin vawiinah Dorgu a chhuak leh bawk a, a rilruhahthlak takzet a ni," tiin a sawi.
Riemer chuan sawi chhunzawmin, "Winger dang pakhat tal ka koh belh a ngai dawn a. Winger emaw full-back emaw khel thei player hmuh chu thil harsa a ni lo, mahse hmun hrang hranga khel kawp thei tur zawn chu a harsa lehzual a ni. Ka tan chuan lu na tham tak a tling a, player pakhat nge pahnih kan koh belh dawn tih ka ngaihtuah a ngai a ni," a ti bawk.
United tan chuan Dorgu-a hliam hi a nat dan leh khelmual a chhuahsan rei dawn em tih hriat nghal theih a la nih loh avangin rilru thlabar takin an nghah a ngai dawn ta a ni. Red Devils hian October ni 10-ah Premier League chhunzawmin Old Trafford-ah Tottenham Hotspur an mikhual dawn a, chutih rualin an player pawimawh hliam an pung chho zel bawk.
Kar tawp liam ta khan Nations League-ah Portugal-in 2-1 a Norway an hneh ṭum khan captain Bruno Fernandes chu a inlan thei lo a, hei hian United hotute ngaih a tiṭha lo hle tawh bawk a ni. Kar liam ta khan Marcus Rashford leh Kobbie Mainoo te pawh England squad aṭangin an inhnukdawk tawh a, striker Benjamin Sesko pawh Slovenia squad aṭangin a inhnukdawk a, goalkeeper Karl Darlow pawh Wales squad aṭangin a inhnukdawk tawh bawk a ni.
