Brian Brobbey-a'n hliam a tuar tak avangin, kar liam ta khan Netherlands chuan Manchester United forward Joshua Zirkzee chu an ram team-ah an ko ta thut a.
Tun season-ah Manchester United tan minute 98 chauh a la khelh avang leh, kum 2024 hnu lamah Netherlands tan a la khelh miah loh avangin he kohna hi mi tam tak tan chuan thil beisei loh tak a ni.
Zirkzee-a an koh chungchang hi sawiin ESPN analyst Hans Kraay Jr chuan United forward hi coach thar Xavi-a ruahmanna leh style nen a inmeh hle thu a sawi. Kraay Jr chuan, "Ani hi goal khung khawl tur bawkil (true 9) a ni lo a, '9.5' ti a sawi theih zawk a ni. Spain ramah chuan national team coach-te hian '9.5' hi an duhzawng tak a ni ṭhin a ni. Xavi hian phurna (passion) leh inpekna (intensity) chungchang hi a sawi uar hle mai.
"Zirkzee hi ball thiam tak leh technical ability nei ṭha em em a ni a. Ball pass kual vel uar chi an nih phei chuan, hnuai lama ball in-pass duhte tan Zirkzee hi thlan sual a ni miah lo," tiin a sawi.
Serbia an hmachhawn hmaa press conference an neihnaah Netherlands coach Xavi pawhin Kraay Jr-a thil sawi chu thlawp zuiin: "Kan system leh kan ngaihdan (philosophy) nen pawh a inhmeh hle a ni. Focal point ṭha tak a ni thei a, team tan pawh a pawimawh em em thei a ni. Player ṭha tak a ni a, ka duh em em bawk. Niminah thil engkim kan sawidun a, kan team tan hian thil tam tak a rawn ti thei a ni.
"Kan number 9 hian team-a mi dangte nen inzawmna ṭha tak a neih a ngai a, technical lamin a puitling tur a ni bawk. Chu mi kawngah chuan Zirkzee hi ka duh hle a, team min puih theih ngei ka ring a ni," tiin a sawi.
Inrinni-a Serbia pana an thlawh chhuah hmain Zirkzee hian team nen training session vawikhat chiah an nei hman a, chuvang chuan match bul ṭan turin inpeih sa a la ni lo. Khualmualah Netherlands hi 2-1 in an chak a, Zirkzee hi bench-ah ṭhutir niin a inlan ta lo a ni. AZ Alkmaar striker Mexx Meerdink chuan bul ṭanin goal hnih a khung thung.
Substitute bench-a ṭhut mai hi Zirkzee tan chuan thil thar a ni lo na a, late call-up a nihna hian chhan a siamsak ve thung. International break chhung hian Netherlands hian match hnih an la hmabak a, khualmualah Greece an hmachhawn ang a, mahni mualah Serbia an mikhual leh ang. Heng match-ah hian Zirkzee hian inlanina hun ṭha a hmuh ve ngei beisei a ni. Inlan lo pawh nise, a pawilutuk lo a ni. Serbia nen an inkhelh ṭum khan Liverpool forward Cody Gakpo chu hliam avangin minute 17-naah lakchhuah a ngai a, hei hian Zirkzee-a tan hmun thar a hawng thei bawk a ni.
