International break avanga Europe league hrang hrang an chawlh zawk avangin, Manchester United aṭanga loan-a chhuak player-te tan kar tawp hman zangkhai tak a ni a, inkhelah an inlan tam lo hle.

Chutih rualin, League Two club Rotherham United-a loan-a awm Jayce Fitzgerald erawh mualah a inlan a. Rotherham-in 1-1 a Crewe Alexandra an inhnehtawk pui ṭum khan, minute 32 chhung khel turin a rawn lut a ni.

Fitzgerald-a'n khelmuala a awm chhung hian key pass a nei lem lo a, a cross vawi thum siamte pawh an tlarhma ten an lo thleng hleithei lo bawk. Mahse, he midfielder naupang hian pass success 80 per cent neiin, a long ball siam a chanve a hlawhtling a, goal zawnah vawikhat shot nei mah se a goal zawn lo thung. A ngai te bawkin midfield lailiah a ṭang na hle a, tackle vawi hnih leh duel vawi li a chuh hlawhtling a ni. League Two table-a 13-naa awm Rotherham United hian Inrinni lo awm turah Exeter City an pan ang.

Chutih laiin, United Women goalkeeper Safia Middleton-Patel pawh kumin nipuia Watford a zawm aṭangin a che ṭha chho hle a. A club zawm thar Watford hi Sunderland lakah 2-1 in tlawm mah se, he keeper naupang hi an team-a che ṭha berte zinga mi a ni leh ta a ni.

Match chhungin save vawi 6 lai a nei a, heng zinga vawi 4 phei chu penalty box chhung aṭanga rawn pet a ni. Tlarhnung vengtute phurrit chhawk nan penalty area chhungah ball kang vawi 3 lai a lo man chat (high claims) bawk. Pass a neihte aṭangin 70 per cent a puitling a, long ball ah 35 per cent a hlawhtling bawk a ni. Table-a 11-naa awm Watford hian Pathianni lo awm turah Wolverhampton Wanderers an hmachhawn ve thung ang.