Manchester City chu Premier League sum hman dan dik lo thubuai (financial charges) 115 zinga 114-ah thiam loh chantir an ni tih chanchin a darh hnuin, Zirtawpni khan football khawvel chu a thawng hle. He thutlukna thar chhuak chungchangah hian Manchester United Supporters' Trust (MUST) chuan City hian an appeal-ah hnehna an chang zo lo a nih chuan hremna na tak an hmachhawn ngei tur a ni tih an tarlang.
Manchester City hian he thutlukna hi an appeal ngei beisei a ni a, tun dinhmunah hremna tur erawh tihfel a la ni lo. Chutih rualin, he thubuai huam chhung hun laia City dawt chiah a pahnihna (runners-up) lo ni tawh club ṭantute chuan nomawi hlihsak a nih a, an club kuta hlan a nih theih beiseiin thil thleng chu an thlir reng a ni. Mithiamte chuan thil thleng enin City hian point paihsak tal chu an pumpelh theih tawh loh an rin thu an sawi a; mahse City lam erawh chuan kum thum liam ta chhung khan thil dik lo engmah an tih loh thu an la ṭang tlat thung.
MUST chuan thuchhuah siamin, City-in dik lo taka hma an lakna "industrialised cheating" chu an appeal-ah sut a nih loh chuan Premier League thuneitute chu hremna khauh tak pe turin an ngen a ni. An thuchhuahah chuan: "Ni tlemte kalta chhung khan, Manchester City chu Premier League charges thehluh zinga a tam zawk—charge 115 zinga 114-ah thiam loh chantir an ni tih chanchin a darh hnuin chanchinbu mi leh mi hrang hrang aṭangin MUST ngaihdan zawtin min rawn be hlawm a.
"Manchester City chuan thil dik lo an tih loh thu sawiin an la ṭang tlat a, appeal theihna dikna chanvo pawh an nei reng a ni. Mahse he thiam loh chantirna hi a dingnghet a nih chuan, account-a tihsual palh mai emaw, dan khirh tak hriat sual vang maia ngaihthah theih a ni tawh lovang. Hei hi khawvel hmuh laia dik lo taka hlawhtlin tumna lian ber (industrialised cheating) a tling dawn a ni.
"Kum tam tak chhung MUST chuan football-ah club neitu nihna hi a pawimawh zia kan lo sawi tawh ṭhin. Manchester United-ah ngei pawh Glazer chhungkuain club chu leiba tam tak an phurhtir a, chu mi rualin pound maktaduai tam tak an la chhuak tih kan lo hmu tawh. A lehlam chiahah pawh pawn lam sum tam tak hmanga club tichak a, inelna dik humhim nana dan awmsa palzut tlat tute kan hmu bawk. Heng neitu pahnih te hi khawtlang tana rohlu club enkawl tur hian an tlak lo ve ve a ni," an ti.
MUST chuan sawi zelin: "Manchester City laka thiam loh chantirna hi a dingnghet zel a nih chuan, an hremna dawn tur chu an thil tihsual nen a inmil tur a ni a, club neitu dangte tan pawh tih ngam tawh lohna khawpa thil huphurhawm a ni tur a ni. Nomawi hlihsak leh a hnu lama hremna pek pawh a tel ngei tur a ni a, mahse a pawimawh ber chu nakin zela eng nge thleng dawn tih hi a ni.
"He hun chhung hian Manchester City hi khawvela club hlauhawm berte zinga mi an rawn ni chho a. Dik lo taka inbumna lian hmanga hetiang dinhmun hi thleng an nih ngat chuan, Premier League aṭanga season khat chhung chhuah tir ngawt pawhin an lo hlawkpuina tam tak chu a la bo dawn chuang lo a ni. Chuvangin hremna chuan an hlawkna lo neih tawh zawng zawng hi a tibo tel tur a ni a, hun reilote chhung harsatna siamsak mai a tawk lo ang.
"Neitu nihna leh rinngam nihna chungchangah zawhna lian tak a awm a. City neitute hian official-te hmuhchhuahna leh kum tam tak mipui hriata finfiahna awm tawh chung pawhin thil sual ti lo angin an la insawi fan a ni. Appeal zawhah pawh he thiam loh chantirna hi a la ding zel a nih chuan, hetiang inbumna lianpui kalpuipuitu neitute hian football club enkawl theihna an la nei tlak meuh em tih chu zawh a ngai tawh a ni.
"He neitu an awm chhung hian rinna nghah theih a nih tawh loh chuan, neitu thar an neih hma chu football inelna (pyramid) aṭanga hnawhchhuah hial chu hremna ngaihtuah tel tur zinga dah a ni tur a ni. Football club-te hi sumdawnna pangngai satliah an ni lova, khawtlang ro hlu an ni. Mipuite rinna tihtharnan football ownership hi enṭhat a hun ta takzet a ni," tiin an thuchhuah chu an tlip a ni.
