Manchester United legend Roy Keane chuan football management khawvela luh leh mai theihna kawngka a la hawn reng thu sawiin, tun dinhmuna a hna thawh mek thlakthleng a inhuam thu a sawi chhuak.
Kum 55 mi Keane hian kum 1993 khan Nottingham Forest aṭangin Red Devils hi a zawm a. Kum 1997-a Eric Cantona-a'n club a chhuahsan hnuah captain niin, kum 2005-a Old Trafford a chhuahsan thleng khan captain mawhphurhna hi a chelh zui a ni. United-a a awm chhung hian Premier League title vawi sarih, FA Cup vawi li leh Champions League nomawi vawikhat a chawi hman a ni. Manchester United tan hian match 480 zet inlanin goal 51 a khung bawk. United a chhuahsan hnu hian Scottish club Celtic tan hun reilote a khel leh a, kum 2006 khan professional football a chawlhsan ta a ni.
Inkhelh a chawlhsan hnu hian management lamah lutin, kum 2006 aṭanga 2011 inkar khan Sunderland leh Ipswich Town te a lo enkawl tawh a. Hei bakah hian Republic of Ireland national team leh Aston Villa-ah te assistant manager hna a lo thawk tawh bawk a ni. Tun hnaiah erawh chanchinbu leh television hrang hrangah football pundit angin a inlar tam hle a, a bik takin Sky Sports-a a inlan dan chu khawvel huapa sawi hlawh berte zinga mi a ni.
Manchester Evening News-in a tarlan danin, Sky Sports-a an 'A-Z feature' an neihnaah Roy Keane hian coaching lama kir leh mai theihna dinhmun a sawi chhuak a. Keane chuan, "Thil mak ve tak chu, kar tawpah inkhel ka en chang hian team ṭhenkhat ka hmu a, 'Saw laiah sawn va kalin hna ka va thawk thei mai ang a' tih ngaihtuahna ka nei ṭhin," a ti.
Amaherawhchu hetiang rilru hi kar tawpa inkhel a en lai vela a neih ṭhin a nih thu leh, chawlhkar thar a lo inṭan meuh chuan chu ngaihtuahna chu a bo leh duak ṭhin thu a sawi bawk. "Manager zawng zawngte kawngpui dunga motor khalh kual leh rilru hahna an hmachhawn te hi ka thlir ṭhin a. Mahse ka rilruah chuan eng emaw chu a la awm ve reng a ni. Meichher nunna te takte chu a la nung ve reng a. Tuemawin min rawn be ta sela, engtin nge i tih ang? Tunge hria le? Mahse a thlen theihna chance erawh a sang lo hle thung ang," tiin a sawi.
Kum 55 mi Keane hian management-a kir leh theihna hunṭha pawh kum liam ta chhung khan a lo nei ve nual tawh tih pha lovin, mahse pundit hna chelh chhunzawm zel a thlan zawk zel chhan a sawifiah nghal bawk. Keane chuan, "A nihna takah chuan kum liam ta tlemte chhung khan hunṭha ka nei ve fo mai. Mahse contract chungchang te, coaching staff buaina te a rawn awm a, 'A dik tak tak dawn em ni?' i ti a. A chang phei chuan, 'I hna thawh lai mekah hian lungawi mai rawh' i inti leh nge nge ṭhin," tiin a sawi zui a ni.
