Manchester United midfielder hlui Donny van de Beek chuan hliam na tak a tuar chhoh hnuah a football career chu a pawtkir leh ṭan mek a, kum hnih hnuah a goal hmasaber a khung ta a ni.
Kum 2020 khan Ajax aṭangin £35million senga Manchester United-in an lakluh van de Beek-a hian, Old Trafford-ah hmun nghet a chang hleithei lova, beisei a phak lo hle. A manager hlui Erik ten Hag-a'n United hotu hna a rawn chelh hnuah pawh he Dutch midfielder hi a che chhuak thei chuang lova, kum 2024 khan £500,000 lek manin Spanish club Girona hnena hralh a ni ta a ni.
Girona hian La Liga-ah pathumna dinhmun an luah zui a, hmakhua eng tak beisei hle mah se, an rin loh lamah thil a kal ta thung. 2025/26 season-ah Girona hi La Liga aṭangin an tla (relegate) a, van de Beek-a pawh he season bul ṭan tir lam hian a kerek leh khup thlunpui hliam na tak (Achilles rupture) a tuar leh zui a, hei hi a career ti chhetu hliam inchhah phei zel zinga pakhat a ni.
Tunah hian Spanish division hnihna La Liga 2-ah Girona tan a khel mek a, Albacete 2-0 a an hneh ṭum khan October 2024 hnua a vawikhat nan goal a khung ta a ni. Goal a khung hnu hian kum 29 mi van de Beek-a hian Instagram-ah a hlimna thuchah tarlangin, "Hun rei tak ka lo beih pui tawh, lawmna hun a thleng ta. Hei hian hmangaihna leh inpekna nena hma lam pan zel turin min cho thar a ni," tiin a ziak a ni. He a post hi a team-mate hlui Lisandro Martinez, Matthijs de Ligt leh Eric Bailly te pawhin an 'like' ve bawk.
Van de Beek-a hi kum 29 mi a ni tawh a, a ruahman ang taka a career hi kal sela chuan tun kar hian Netherlands ram aiawhin international match-ah a inlan mek ang. Mahse, Netherlands tan a inlan hnuhnung ber aṭangin hun rei tak a liam tawh a ni. Mahse, Spanish second tier-a mipuite ngaihsak zui vak loha hun a hmang hi van de Beek-a tana mamawh tak zawk pawh a ni maithei. Tun season-ah Girona tan match 4 inlan tawhin, an club hi league-ah pangana (5th) dinhmun an luah mek a ni.
Manchester United tan van de Beek-a hian match 62 a khelh chhungin goal hnih a khung a, Everton leh Eintracht Frankfurt-ah te loan-in a lo khel tawh bawk a ni.
