International break chawlh an hman mekin Manchester United chuan hliam vanga harsatna thar an tawk leh ta a, an defender Noussair Mazraoui chu ram tana a khelhna lamah a inhliam leh hlauh mai.

United hian Premier League khelh chhunzawm leh turin kar hnih dawn nghah an la ngai a. Michael Carrick leh a naute hian Fulham nen 1-1 a an inhnehtawk hnuah he chawlh hi an hmang ṭan a, tun season league match nga khelh tawhah vawikhat chiah hnehna an la chang a ni.

United player eng emaw zat chu mahni ram theuh tana khel turin an fehchhuak a, Mazraoui pawh hi Africa Cup of Nations qualifier khel tura Morocco squad-ah a tel a ni. Thawhlehni tlai khan Morocco hian an Group A match-ah Lesotho an hmachhawn a, coach Mohamed Ouahbi chuan he inkhelah hian Mazraoui chu left-back-ah a bul a ṭantir a ni.

Morocco hian 2-0 in hnehna chang mah se, second half-ah Mazraoui chu khelmual chhungah a tluk tak avangin United tan ngaihven zui tham thil a thleng ta a ni. Touchline bula tackle a neih hnuah, Mazraoui hian medical team puihna a ngen nghal a, na a tuar hle tih a lang. A hliam hi engtianga na nge tih hriat chian theih a la ni lo a, minute 69-naah lakchhuah niin Paris Saint-Germain star Achraf Hakimi chuan a rawn thlak ta a ni.

United chuan kum 28 mi Mazraoui-a dinhmun hi an ngaihven zui hle dawn a, he international break chhung hian Morocco tan a inlan chhunzawm thei dawn nge dawn lo tih chu an ngaichang dawn a ni.

United hian international break chhung hian hliam vanga buaina dang pawh an tawk nual tawh a, Mazraoui hi kar kalta chhunga hliam nei pasarihna a tling hial a ni. Denmark-in Wales 2-0 a an hneh ṭum khan Patrick Dorgu chu hliam avangin lakchhuah a ngai tawh a; Bruno Fernandes pawhin Portugal-in Norway an hneh ṭum khan hliam tenau avangin match a hmaih a, mahse Ningani zana Denmark an hmachhawn hunah chuan a inlan leh theih beisei a ni bawk.

Heng bakah hian Karl Darlow chu Wales squad aṭangin a inhnukdawk a, kar hmasa khan Marcus Rashford leh Kobbie Mainoo te pawh England squad aṭangin an inhnukdawk tawh bawk a, Benjamin Sesko pawh Slovenia squad aṭangin a inhnukdawk tawh bawk a ni.

United chuan heng an player hliamte hian Premier League an khelh chhunzawm leh hma ngeia dam ṭhat hman vek an beisei hle a ni. International break hma pawh khan United hian hliam vang tho hian Amad Diallo, Manuel Ugarte, Matthijs de Ligt leh Tom Heaton te an lo chhawr thei lo sa tawh a ni.

Manchester United hian an match lehpekah October ni 10 khian Old Trafford-ah Tottenham Hotspur an mikhual dawn a ni.