"Carlos hi midfielder theihna sang tak nei, hmasawn zel thei a ni," tiin Manchester United-in Carlos Baleba an lakluh fel khan director of football Jason Wilcox chuan a lo sawi tawh a ni.

United hian tun season bul an ṭan chhe hle a, match nga an khelh tawhah point nga chiah hmuin, international break an neih hmain Premier League table-ah 12-na dinhmun an luah mek a ni. Chuvang chuan Wilcox-a'n Baleba theihna a lo beisei sang em em ang chiah hian, an squad tana player chhawr tlaktak a nih ngei an mamawh tawh hle.

Baleba hi Brighton tana pre-season a hman laia a kerek tha (ankle ligament) a tihhliam avangin United a rawn luh tirhin khelmualah a la inlan thei lo a nih kha. A hliam hi lian tham a nih loh avangin United hian £70million sengin an la lut tho a, mahse a debut siam erawh a tikhawtlai phah thung a ni. September thla laihawl khan khelmualah training tenau nei ṭanin, squad pum nen full training an neih hnuah, Stockport Station aṭanga Fulham hmachhawn tura London an pan ṭum khan Baleba hi a rawn inlan ve ta a ni. Craven Cottage-ah hian 1-1 in an inhnehtawk a, Baleba hi bench-ah ṭhuin khel lova awm mah se, inkhelh zawhah naupang pakhat hnenah a jersey a pe a ni.

Fulham laka an inhnehtawk hnu khan United player-te chet dan chu a zawi viau nia sawi a ni a, league chhunga tlan kual tlem ber pawl an nihna chuan sawisel a hlawh hle. Michael Carrick-a tactics te chu chhan pakhat ni mah se, khelmuala tha thah hnem tawk lohna hi buaina lian tak a tling a ni. Youri Tielemans leh Kobbie Mainoo te hi tlar lailia che kual zung zung chi an ni lo a, chuvang tak chuan Baleba-a chakna leh a energy chu United midfield-in an mamawh em em a ni. 2024-25 season khan Baleba hi league-a midfielder langsar berte zinga mi a ni a, darkar khata kilometer 34 aia chaka tlan thei midfielder pahnih zinga pakhat a nih bakah, tackle leh interception 92 neiin top-flight midfielder zingah parukna dinhmun a hauh a ni.

Nipui liam ta khan United hian Baleba hi lak an lo tum tawh a, mahse Brighton-in a man to lutuk an phut avangin a theih loh a nih kha. Hemi avang hian a khelh dan a tlakhniam phah a, Brighton manager Fabian Hurzeler pawhin, "Manchester United-in sum tam tak thehchhuaha lak an duh tih hriat khan rawlthar tan chuan ngaihtuahna a tibuai ve thei chiang a ni," a lo ti hial a ni.

Hemi bakah hian Cameroon manager David Pagou chuan Africa Cup of Nations khelh lai khan Baleba hian chhungkaw harsatna a neih thu leh a rilru lam buaina a tawrh thu a lo sawi bawk. Pagou chuan, "Carlos hian harsatna a tawk a, a rilru siamṭhat leh kha hna hmasa ber a ni. Khelmual lailia thunun theitu a rawn nih leh theih nan theih tawp kan chhuah a ni," a ti. United data department te pawhin Baleba hi an chhut sang hle a, second ball la hnem ber zaa pakhat (top 1%) zingah a tel bawk a ni.

Carrington-ah Baleba hi a tlangnel chho tawh hle a, mi fiamthu duh tak a ni tih a lang chho zung zung bawk. An ram mi Bryan Mbeumo nen an inkawm ngeih hle bakah Leny Yoro leh Amad te nen pawh gym lamah hun an hmang dun nasa hle. Player dangte chawlh pek an nih lai pawhin amah hian Carrington-ah mimal session neiin a inbuatsaih a ni.

October ni 10 hian United chuan Tottenham chu Old Trafford-ah an mikhual dawn a, ni 11 chiah a ngai tawh a, he match-ah hian Baleba hian a debut a siam ngei beisei a ni. Kumin nipuiah £334m zet seng chhuak mah se Tottenham pawhin point 2 chauh hmuin table mawngphahah an awm mek a, team pahnihte tan he match hi a pawimawh em em dawn a ni.