Arsenal captain hlui leh club legend Patrick Vieira chuan an hun lai khan an elpui lian ber Manchester United chuan lakluh an lo tum ṭhin thu leh, manager ropui Sir Alex Ferguson nen ngei pawh an lo inhmuh tawh thu a puangzar.

Kum 1990 chawhnu lam leh 2000 chho vel khan Arsenal leh Manchester United te hi Premier League nomawi inchuhin an inel na em em ṭhin a. Khelmual chhungah Vieira leh United captain Roy Keane te inhmachhawn dan kha football khawvela inelna ropui berte zinga mi a ni hial ṭhin a ni. Chutiang boruak lian tak a awm lai chuan Ferguson-a'n he France midfielder lakluh hi a lo tum ru reng a ni.

Vieira chuan a hun lai khan Ferguson nena an inbiak dan chu sawichhuakin, "Sir Alex Ferguson nen khan kan inhmu ngei a, inbiakna pawh kan nei a ni. Manchester United-a min lakluh a duh thu a sawi a, ka tan chuan zahawm tak leh lawmawm tak a ni," tiin a sawi. Mahse Arsenal tana a inpekna a san em avang leh manager Arsene Wenger nena an inzawmna a thuk em avangin Old Trafford pan chu a thil tih theih loh tawp a nih thu a sawi bawk.

"Arsenal-ah ka hlim em em a, Arsene Wenger-a'n ka chungah rinna a nghat lian hle a ni. Kan elpui ber Manchester United pan chu Arsenal fans-te leh club tana thil theih loh tluk a ni," tiin Vieira chuan a sawi zawm a.

Vieira hi kum 1996 khan AC Milan aṭangin Wenger-a'n Arsenal-ah a lalut a, Gunners tan match 400 chuang khelin Premier League title vawi thum leh FA Cup vawi li a lakpui a ni. Kum 2003-04 season-a Arsenal-in tlawm nei miah lova 'Invincibles' tia chanchin an ziah ṭum pawh khan captain a ni nghe nghe.

Kum 2005 khan Arsenal chhuahsanin Italian club Juventus a zawm a, hemi hnu hian Inter Milan leh Manchester City-ah te a khel leh bawk a ni. United-in an lo dawr tawh ṭhin thu leh Ferguson nena an inhmuhna thuruk hi kum tam tak liam hnuah a rawn puangchhuak ta a ni.