World Cup quarter-final-a Spain laka Belgium an tlawm ṭum khan, hliam avanga Thibaut Courtois-a thlaktu Manchester United goalkeeper Senne Lammens-a tan chuan kha match kha a career thleng pawha nghawng pawi tak nei tur anga ngaih a ni a.
California-a inkhelah khan, match tawp hmain minute hnih chauh a bak tihin Pau Cubarsi-a ball pet chu Lammens-a hian a lo thlauh a, chu chu Mikel Merino chuan goal-ah chantirin Belgium chu inelna aṭangin an tla ta a ni. Courtois-a thlaktu nih chu pressure sang tak a ni a, a bikin World Cup knockout match-ah, score a inhniam reng laia international experience nei tlem tak (Liechtenstein leh USA nena friendly match chauh khel tawh) tan phei chuan a harsa zual a ni.
Royal Antwerp aṭangin Manchester United-in £18.2million-in an la a, Old Trafford-ah season hmasa ber hmang ṭha tak ni mah se, Courtois-a hmunruak luah tura Lammens-a a rawn inkhawh chhoh hi thil harsa tak tur nia ngaih a ni ṭhin. Mahse World Cup hnu thla hnih liam ta chhung khan thil a danglam chho hle a. Courtois-a'n kumin chhunga Nations League match-a inlan loh a thlan tak avangin, kum 24 mi Lammens-a tan hian hmun ruak luahna kawng a inhawng ta a ni.
Nations League match-ah Italy leh France te hmachhawnin Lammens hian bul a ṭan tawh a, Belgium hian vawikhat hnehna changin vawikhat an tlawm thung. Mahse Lammens hian a shot hmachhawn 12 zingah 11 lai a lo dang a, expected goals (xG) 1.32 lai goal chhuah lo tura humhimin a che ṭha hle. Zirtawpni zanah Turkey an hmachhawn ang a, Thawhṭanniah France an hmachhawn leh bawk ang. November thlaah Turkey leh Italy te an hmachhawn leh dawn a, hetiang zela a chet ṭhat chhunzawm chuan head coach Mark van Bommel-a hnuaiah goalkeeper rinrawl ber a ni zui mai theihna dinhmunah a ding a ni.
Belgian newspaper HLN hnena a sawi danin, Courtois chuan Van Bommel-a'n bul ṭantute zinga tel ngei tura intiamna a pek theih loh avangin kumin chhunga ram tana khelh chhunzawm rih loh a thlang tih a sawi. Kum 34 mi Courtois chuan, "Red Devils tan Nations League campaign pum hi khelh rih loh ka thlang a ni. Goalkeeper dangte hliam avanga buaina a awm a nih ngawt loh chuan koh ka nih ka inring rih lo. Euro qualifiers-ah erawh ka inpeih leh dawn a, hetah hian ka hmun humhim turin ka ṭang dawn a ni," tiin a sawi.
World Cup-a a tihsual chungchang leh Courtois-a chawlh chungchang sawiin Lammens chuan, "Kha thil thleng kha theihnghilh mai a harsa hle a, rilru khawih tak a ni. Ram leh team puih ka duh em em a, mahse chumi ṭum chuan a thleng dik ta lo a ni. Football-ah chuan hetiang thil hi a thleng ṭhin a, ka theih ang anga theihnghilha hmalam pan vat ka tum ta a ni," a ti. Courtois-a chungchang sawi chhunzawmin, "Thibaut hi khawvela goalkeeper ṭha berte zinga mi a ni a, a theihna a phochhuak tawh hnem hle. A tan hmun a awm reng ang. A rawn kir hunah a khel zui ang em tih zawng ka ngaihtuah ber a ni lo. Khelmualah ka awm a nih pawhin awm lo a nih pawhin theih tawp ka chhuah reng dawn a ni," tiin puitling takin a sawi bawk.
Nikum khan Old Trafford-a a thlen tirhin Lammens hi a insiamrem nghal em em a, United No. 1 goalkeeper puitling a nih zia leh a rilru puitling zia a phochhuak tawh a ni. Tunah pawh hetiang bawk hian a ram Belgium tan hun ṭha a rawn chang chho mek a ni.
