Manchester United chuan an club academy thuam chak zel tumin an elpui lian Manchester City aṭangin central midfielder David Eze chu an lalut fel ta a, kar tawp khan lehkha pawimawh zawng zawng enfiah a nih hnuah he transfer hi official-in an nemnghet a ni.

Eze hi Karim Cassim-a hnungzuiin City chhuahsana hmakhua eng zawk beiseia Old Trafford zawmtu a ni a, anni pahnih hian United academy tlar laili chu an rawn ti chak hle tura ngaih an ni. He rawlthar hi Manchester United-a a luhfel hnu lawkah ram tana fehchhuakin, ni tlemte liam ta chhung khan England under-17 squad a zawm nghal a ni.

Germany rama ram pali inelna (four-team tournament) neih mekah, Three Lions hian an match hmasa berah Israel an hmachhawn a. He inkhelah hian Eze chu substitute niin minute 77-naah bench aṭangin a rawn lut a, England-in 2-1 a hnehna an chan theih nan hun tawp thleng a khelhpui a ni.

He inkhel hi England under-17 tana Eze-a inlan hmasak ber (debut) a ni a. Hemi hma hian under-16 tan match 9 a lo khel tawh bakah under-15 level-ah pawh a lo inlan tawh a, tun ṭuma under-17 tana a rawn inlan leh theihna hi a football career-ah phei chuan hmasawnna pawimawh tak a ni.

He tournament-ah hian England chuan Venezuela leh a thlengtu Germany te an la hmachhawn chhunzawm dawn a, match lo awm turah hian Eze chuan bul ṭan theih ngei a inbeisei hle. Amah hi he England squad-a Manchester United aiawh awmchhun a ni bawk.

He inelna hi Eze tan chuan match fitness leh khelmuala chet ṭhat theihna (match sharpness) neih let leh nan hun remchang tak a ni hlauh thung. City aṭanga United a pan dan thilah buaina neuh neuh a awm avangin inremna siam nan hun a duh rei phah a, hei vang hian tun season chhungin club ve ve tan eng game mah a la khel thei lo a ni.

Chu mai bakah, United under-18 team te hian October thla laihawl hma chu match an neih dawn loh avangin, Eze hian khelmual a rah tam theih nan ram tana an match khelh mekte hi a chhawr ṭangkai hle a ngai dawn a ni.