Transfer window khar tawh mah se, Manchester United chuan international break chhung hian an academy thuam nan player ṭha lakluh an chhunzawm zel a, Liverpool academy winger Isaac Konde chu an lakluh thu an puang ta a ni.
He rawlthar an lakluh hi head coach Michael Carrick-a tana season bul ṭan a harsat lai tak a ni a. International break chhung hian player hliam an nei belh bawk nen, United hian Premier League-ah 12-na dinhmun luahin, Carabao Cup aṭangin an tla fel der tawh bawk a, Carrick-a tan pressure a sang hle a ni.
Hemi rual hian Aston Villa striker hlui Gabriel Agbonlahor chuan, Manchester City-in Premier League financial rules an bawhchhiatna thubuai 115 zinga 114-ah thiam loh chantir an nih hmel tak avangin, City dinhmun derthawng chu United hian remchanga hmang se a duh thu a sawi.
City laka hremna pek tur hi tihchian la ni lo mah se, relegation thleng hial an tawk a nih chuan player tam takin Etihad Stadium an chhuahsan a rinawm a ni. Agbonlahor chuan talkSPORT hnenah United-in City aṭanga an lakluh awm player pahnih a sawi chhuak a:
"Donnarumma hi United hian an la tur a ni. Senne Lammens-a khelh dan hi ka en reng a, World Cup-ah khan a che ṭha lo va, Belgium tan khan a tlawm phah hial a ni. Tun season-ah pawh a la ṭha tawk lo; Fulham laka Lisandro Martinez-a own goal khung ṭum pawh khan a dang ṭha tawk lo a ni. Ka la ringngam meuh lo. Chuvang chuan Donnarumma hi Man United-ah kal se ka ti a ni. United hian City goalkeeper rinrawl hi an chhuhsak thei a ni," tiin a sawi.
Agbonlahor chuan sawi chhunzawmin, "Elliot Anderson pawh hi United-in lak an lo duh tawh a, tunah hian a man zatve vel pawhin an la thei maithei a ni," a ti bawk. City hian nipui lai khan £116m sengin Anderson hi Forest aṭangin an lalut a, Donnarumma pawh PSG aṭangin £26m-in an lo lalut tawh a ni.
United hian Liverpool aṭanga an lakluh Isaac Konde hi kum 17 a tlin hun October thlaah professional contract an ziahpui dawn a, tunah erawh scholarship agreement an ziahpui rih a ni. The Athletic tarlan danin Liverpool chuan zangnadawmna (compensation) sum tam tham tak phutin hma an la mek bawk.
United thuchhuah chuan, "Manchester United chuan winger Isaac Konde chu an lakluh theih nan inremna an siam fel ta. He rawlthar theihna nei ṭha tak hian Liverpool a chhuahsan hnuah min rawn zawm a ni. Kum 16 mi hian 2025/26 campaign tawp lam khan Liverpool Under-18 tan match a khel ṭan a, club-a mi zawng zawngin Isaac-a hi kan lo lawm a, duhsakna sang ber kan hlan a ni," tiin a tarlang.
Konde hi mual sir tawn tawn (left leh right wing)-a khel thei a ni a, season liam ta khan Liverpool Under-18 tan match 6 khelin assist vawi khat a nei hman a ni. United hian an elpui lian City academy aṭang pawhin midfielder David Eze leh Karim Cassim te an lo lalut tawh bawk a ni.
