International break chhung khan England tana Lewis Hall-a chet ṭhat dan chuan Manchester United hotute rilruah ngaihdan in-hung tak a siamsak ngei ang.
Kumin nipui transfer bazar chhung khan kum 22 mi Hall hi United-in left-back position tana transfer bazar-a an lak luh tum ber a ni a. Mahse, United hian an sum neih dante chhutin, midfielder pathum lakluh an ngaih pawimawh zawk miau avangin he defender lakluh hi an ṭhulh ta zawk a ni. Ba nei hnem tak club an nih avangin 'Big Six' elpuite nena sum inchuh chu an tlin lo a, chuvang chuan sum hman lamah chauh ni lovin, transfer indawrna kalpui kawngah pawh fimkhur takin hma an la a ni.
United hian Hall hi nipui chhung zawng khan an duh hle a, a tir te aṭang khan uchuak zawka nawrin kum 22 mi hi lo dawr ni se chuan, inremna an siampui hman ngei a rinawm. Khatih lai khan Hall hi Newcastle-in season an khar chhiat avang leh World Cup khel tura a inbeiseina a thamral tak avangin a lungawi lo hle a, Old Trafford pan hi a lo chak ve hle a ni. Transfer window inhawng tir khan United hian lo dawr hman se chuan chhanna ṭha zawk an dawn a rinawm hle.
Mahse United hian an nghak khawmuang a, a tawpah Newcastle chuan Sandro Tonali, Anthony Gordon leh Bruno Guimaraes te an hralh tak hnu phei chuan, anni zui tura Hall-a chhuah chu an phal ta lo bur a ni.
Hetiang a nih tak avang hian United chuan left-back thar la lovin transfer window an khar ta a, an defender Luke Shaw chu match sarih khelh tawh zingah match thum lai hliam vangin a inlan thei lo nghal der tawh a ni. Shaw-a awm loh chhung hian Patrick Dorgu leh Noussair Mazraoui te chu he hmunah hian chhawr ni mah se, an talbuai hle a ni.
Hall hi United-in an lak luh tum ber zinga mi a ni chhunzawm zel a, nakkum nipuiah chuan left-back pakhat tal lakluh ngei an tum bawk ang. Mahse he Chelsea academy chhuak rawlthar man hi tunah hian a to chho em em a, hei hian an inleina kawng a tikhirhkhan thei hle ang. Kum 2027-ah United hian an defence thuam ṭhat an tum dawn a, chutih hunah pawh chuan player thar pathum emaw pali emaw lakluh nan an sum neih chu an thehchhuah leh a ngai dawn a ni.
Thla li liam ta chhung khan Hall-a dinhmun hi a inthlak danglam nasa hle. Newcastle-a lungawi lo leh England left-back zinga beiseina nei sang lo tak a nih aṭangin, St James' Park-ah contract thar a ziak a, manager thar Matthias Jaissle hnuaiah minute tin khelmualah hun hmangin a che ṭha hle a, tunah phei chuan ram tana a hmun nghet nei thei tur dinhmunah a ding mek a ni.
Spain an hmachhawn ṭum khan Hall hi bench-ah a ṭhu a, Manchester City player Nico O'Reilly chu left-back-ah a khel a. Mahse O'Reilly-a hliam tak avangin Hall hian khelhna hun remchang a hmu zui ta a ni. Thawhlehnia Czech Republic laka a khelh bakah, Inrinni khan Rijeka-ah Croatia 7-0 ngawta an sawp ṭum khan a khel ṭha em em a ni. Ball a khawih tam a, tlar hnung a veng ṭha a, tlar hma lama nawr kawngah pawh thahrui ngah takin a che a ni.
United tana beiseina la awm chu, Newcastle khelh dan hi Hall-a theihna nena a inthlauh deuh avangin, tun season-ah Newcastle hi Europe inelna khel thei tura an tling zo lo a nih chuan, contract thar ziak mah se nakkum nipuiah chuan chhuah theihna chance a la awm thei dawn a ni. Mahse chanchin duhawm lo zawk chu, Hall hi a rawn chet ṭhat chhoh em avangin a man a to tial tial ang a, club dang ngaihven a hlawh zual dawn bawk a ni.
