Manchester United chuan head coach Michael Carrick-a hnuaia an kal chhohna tichak zual tur leh squad thuamṭhat nan January transfer window atana ruahmanna ṭha tak an duang chhuak mek nia report a ni. Red Devils hian hma lam huna transfer window lo thleng turte thlirin an tlar hnung (defence) siksawi leh thuamṭhat chu an thiltum laipui berah an dah dawn a ni.

Tun season inṭan aṭangin Manchester United tlar hnung dinhmun hi a ṭha tawk lo hle tih hai rual a ni lo a, khelmual chhungah tlar hnung phui loh avangin buaina an tawk chho mek a ni. Inelna hrang hrang huamin match sarih (7) an khelh tawh zingah clean sheet vawikhat chauh an la nei thei a, hei hian an defence a ngaihtuahawm zia a pholang chiang hle. Tlar hnung phui tawk loh avang hian team pum chet danah nghawng ṭha lo a nei chho a, Carrick-a hnuaiah beisei ang takin thil a la kal thei bik lo a ni.

Chu mai a la ni lo, Red Devils hian tun season match khelh tawhah vawi li (4) ngawt match khatah goal hnih (2) emaw a aia tam emaw an chhuah ziah bawk a, hei hian an tlar hnung ngheh lohzia a tarlang nawn leh a ni. Tun thlengin inelna hrang hrangah match hnih (2) chauh hnehna an la chang thei a, chak aiin tlawm leh inhnehtawk an ngah zawk hle. Goal chhuah hnem lutuk leh tlarhnung ngaihtuahawm tak nei chung hian club lian nih a tlin theih loh tih a chiang hle a ni.

Hetiang buaina an tawh mekte chinfel nan hian United chuan an tlar hnung thuamṭhat chu hmairawnah an nei ta a. Transfer window lo thleng turah hian tlarhnung siksawi lian tak neih an tum a, a bikin left-back leh centre-back position-a player thar lakluh chu an ngaih pawimawh hmasak ber tur an ni dawn a ni. Hetianga defence laili leh veilam tlar hnung thuamchak hi Carrick-a hnuaia United team dinhmun siamṭhat nan leh, season chawhnu lam hmachhawn nana thil pawimawh tak tur a ni.

United hian January thla bazar hun remchang hi hmang ṭangkaiin, an tlar hnung phui tawk lo te siamṭha a, khelmualah an elpuite hmachhawn turin inbuatsaihna khauh zawk neih an tum a ni. January transfer plan ṭha tak an duan chhuah mekte hian Michael Carrick-a hun ṭan chhoh mek chu nasa taka a puih theih an beisei a, an tlar hnung siam rem a nih theih chuan club dinhmun pawh a siamṭhat chhoh ngei an inbeisei a ni.