Tun season tharah Manchester United bul ṭan dan a fuh tawk loh avangin, Old Trafford-ah manager Michael Carrick-a dinhmun chu ngaihven a hlawh chho hle.
English manager hian season liam ta January thlaa caretaker manager hna a chelh aṭang khan chet ṭha tak a ni a. Tlarhma lam na taka nawrin goal an khung hnem hle a, Premier League-ah pathumna dinhmun nghet tak an hauh theih phah a nih kha. Hei hian Theatre of Dreams-ah Carrick chu season tawp hmain full-time manager nihna a pe nghe nghe a ni.
Nipui bazar chhung khan tlar laili thuam chak nan player ṭha lakluh ni bawk mah se, tun season-ah erawh beisei an pha lo hle thung. League match nga an khelh tawhah vawikhat chauh hnehna an la chang a, point table-ah 12-na ngawtah an hnufual mek a ni. Chu mai bakah, Brighton & Hove Albion laka 3-2 a an tlawm tak avangin EFL Cup aṭangin an tla hma hle bawk. Hetiang dinhmun a nih tak avang hian manager thlak chungchang sawi a ri zui ṭan a, Chelsea manager hlui Antonio Conte chu thlan tur zinga mi angin a hming a ri langsar hle.
Conte hi Premier League-ah chuan tawn hriat nei ṭha tak a ni a, Chelsea a enkawl lai khan league nomawi a lo chawipui tawh a ni. Tottenham Hotspur pawh lo enkawl tawh mah se, Spurs-ah erawh beisei a pha ta lo thung. Italian tactician hian Juventus-ah Serie A title vawi thum a la a, Inter Milan-ah vawi khat a chawi bawk. Hemi bakah 2024-25 season khan Napoli chu Scudetto a lakpui a, season liam ta khan pahnihna niin kumin nipui khan an club hi a chhuahsan a ni.
United chet chhiat chhoh tak avangin Conte hi a vawithumna atan Premier League-a a kir leh theihna kawng an sawi chho a, mahse Conte hian a hmabak ruahmanna chungchang a sawi chhuak ta thung. Kum 1996-a Juventus-in Champions League nomawi an lak champhaphak kum 30-na lawmna, Trento khuaa Festival dello Sport neihah Conte hi sawm a ni a. Amaherawhchu a hmunah a kal thei lo va, video message a thawn ta zawk a ni.
Conte chuan, "Kha Juve team tana hlawhtlinna ropui ber kum 30-na kan lawm thei hi a ropui takzet a ni. Kha squad aṭang khan Marcello Lippi-a kaihhruaina hnuaia kan inlaichinna ṭha tak kha ka hre reng ṭhin," a ti.
Chawlh hahdam lailawk a tum thu sawi langin Conte chuan, "Nangmahni nena awmho kha ka duh hle mai a, mahse tun dinhmunah Italy-ah ka awm lo a ni. Kumin hian chawlh hahdamna hun ṭha ka nei hlauh a, ka chawlh hmang mek hi nuam ka ti hle rih a ni," tiin a sawi.
Conte-a thusawi aṭang hian United-in Carrick hi ban thut pawh nise, Conte hian hna hi a chelh nghal mai theih loh hmel a ni. Mahse engkim hi boruak kal dan azirin a inthlak thei tho bawk. Tun dinhmunah chuan kar thara club football a chhunzawm leh hunah Carrick hian team dinhmun siamṭhain khelmualah an che ṭha leh thei ang tih chu fans-ten an beisei ber a ni.
