Freiburg striker Igor Matanovic chu Premier League lam pana chhuak thei dinhmunah a ding mek a, he kum 23 mi forward ngaihventu zingah hian Manchester United chauh ni lovin, Arsenal leh Chelsea te pawh an tel ve bawk niin thuthang a awm. German club Freiburg hian an striker man atan hian £50million vel an chhiar nia tarlan a ni.

England ram a pan dawn tih emaw, Old Trafford a thleng ngei dawn tih emaw nemngheh a la ni lo na a, Mark Brus-a'n Caught Offside column-a a ziah danin, United-in Matanovic an ngaihven mek lai hian Arsenal leh Chelsea te pawh an rawn inrawlh ve nghal a ni. The Peoples Person pawhin he report hi chhuah ve bawk mah se, a rintlak zawng chu 10 zinga 5 (5/10) velah an chhut a, Matanovic hian a hmabak tur chungchangah thutlukna mumal a la siam lo hrim hrim nia ngaih a ni.

Caught Offside column-a Mark Brus-a ziah danin: "Tun hnaiah Manchester United chhungrila hotute chuan Matanovic-a chungchang hi an sawiho tih hriattir kan ni a; chu bakah tun season chhung hian Arsenal leh Chelsea official-te pawhin a inkhel lai vawi eng emaw zat an va thlithlai tawh bawk a ni," tiin a tarlang. Scouting lam aṭanga an thlithlai hian ngaihven a hlawh chho hle tih tilang mah se, dawrna (formal offer) thehlut club an la awm lo thung.

Brus-a hnenah hian hming sawi lang duh lo thudawnna pakhat chuan, club aṭangin dawrna mumal a awm a nih chuan Matanovic hian England rama khelh chu a hnial loh tur thu a lo sawi tawh bawk a. Hei hian Premier League pan chu a rilruk ve hle tih a tilang a, mahse inremna siampui emaw, club pakhat zawk thlan bik emaw a la nei lo a ni.

The Peoples Person tarlan danin, United hian an tlarhma tichak zual turin kumin kum tawp emaw, nakkum January transfer bazar inṭan hunah emaw hma lak an rilruk maithei a ni. Tun dinhmunah Joshua Zirkzee chu beisei a phak meuh lova, tun season chhungin bul a la ṭan miah lo bawk; chutih rualin Benjamin Sesko pawhin tun hnai hian hliam vangin harsatna a tawk bawk a ni. Heng squad dinhmun avang hian Old Trafford club hian striker thar zawn kawngah hma an la mek a, Nicolo Tresoldi pawh an ngaihven zinga mi a ni.

Tun season-a a bulṭan dan hian Matanovic-a hming a vawrh lar zual hle a. Transfermarkt data The Peoples Person-in an tarlan danin, inelna hrang hrangah match sarih (7) a inlan aṭangin goal ruk (6) a khung bakah assist vawi hnih (2) a nei tawh a; chung zingah chuan Bundesliga match li (4)-ah goal thum khungin assist vawi khat a nei bawk a ni.

Brus-a tarlan zel danin, kumin nipui bazar lai kha chuan Matanovic hi £30m vel senga lakluh theih a ni mai thei a, mahse a khelh ṭhat chhoh tak em avangin a man chhiar zat hi tunah chuan £50m velah a per kai ta a ni. Freiburg hian kum hmasa lama £50m ngawta Aston Villa hnena an hralh Johan Manzambi-a man zat tlukpuiah hian Matanovic-a man hi an chhut nia sawi a ni bawk.

January transfer window-ah hian United leh Premier League club dangte hian dawrna an thehlut mai thei nia ngaih a ni a, mahse tun dinhmunah chuan leina tura dawrna thehluh a la awm lova, Matanovic pawhin thutlukna a la siam lo. United, Arsenal leh Chelsea te hian he striker hi an duh tak tak a nih chuan, Freiburg-in a man atana £50m an chhiar zat hi an thehchhuak ngam ang em tih chu hunin a la hril ang.