Manchester United goalkeeper Senne Lammens chuan ram tana a khelh ṭumah a chet ṭhat em avangin fakna a dawng nasa hle a. Kum 2025 nipui lai khan he Belgian goalkeeper hi hming langsar lutuk lo leh rinhlelh thama la awm ni chungin Old Trafford-ah a rawn lut a, mahse tunah chuan a theihna pholangin mi tam tak mit a la chho mek a ni. Ram tana a khelh ṭhatna hian United fan-te leh hotute a tihlim hle a, a bikin a chet ṭhat dan hian hma hun eng tak a nei tih a tarlang chiang hle.

Old Trafford-a khelh hian pressure a sang em em a, goalkeeper naupang tak tan phei chuan thil awlsam a ni lo. Lammens chuan he pressure lian tak a hmachhawn dan leh khelmuala a chet vel dan chungchang sawiin, goalkeeper rintlak nih nana thil pawimawh ber chu pressure hnuaia inbengdaih thiam hi a nih thu a sawichhuak a ni.

United club website-in a kawmnaah Lammens chuan, "Goalkeeper ṭha tak nih i duh chuan, tlarhnung vengtute hnunga lungpui anga nghet i nih a ngaiin ka hria. Hun harsaah nangmahah rinna an nghah a, an innghahna i nih a ngai a ni. Chu chu ka chhuang ve hle a. A aia sanga ka chhoh leh dawn avangin hmasawnna tur ka la nei tih ka hria; mahse, ka theihna zinga ka chhuan ve em em leh hma sawn ka tumna pakhat chu a ni," tiin a sawi.

A mizia leh a rilru put hmang a sawi chhunzawmnaah Lammens chuan, "Ka nu leh pate hi mi zaidam leh phili ve mai mai lo an ni a, chu bakah tleirawl ka nih lai aṭanga ka lo seilen dan te, nakina goalkeeper ka la nih duh dan turte ka suangtuah khan; goalkeeper zinga theihna ṭha ber chu pressure sang tak hnuaia inbengdaih theih hi a ni tih ka hria a. Tihsual kan neih chang pawhin phili lova theihnghilh a, team tana a ṭha ber thehchhuah leh vat kha a pawimawh ber a ni," tiin a sawi belh a ni.

He Belgian goalkeeper chet ṭhatna hian mi thiamte mit a la hle a, Dutch manager hmingthang Mark van Bommel pawhin Lammens-a theihna leh a rilru puitling tak chu a lo fak tawh hle a ni. United-in kum 2025 nipui transfer bazar-a an lakluh tirh khan mi tam takin an lo rinhlelh deuh laiin, scout Tony Coton-a'n uluk taka a lo thlithlai hnuah director of football Jason Wilcox-a'n a lakluhna kawngah hma a lo la a. Wilcox pawhin Lammens-a phili lohna leh a hruaitu nihna chu a lo fak awm hle a ni. Tunah hian Lammens hian a theihna pholang chhunzawm zelin, United tlarhnung venhimna kawngah lungpui anga nghet nih a tum tlat a ni.