Manchester United chuan an striker Benjamin Sesko-a man atan pound maktaduai 64 (£64m) an chhiar nia report a ni a. Hemi rual hian Europe khawmualpuia club lian Barcelona leh Juventus te chuan kum 2027 chhung hian he striker lakluh theih dan tur hi an ngaihtuah mek nia tarlan a ni.

Old Trafford club hian Sesko-a man atana hetiang zat an chhiar chhan lian ber pakhat chu hliam buaina a neih chhunzawm reng vang niin an sawi a. Khelmuala hun rei tak chhung a inlan theih loh bakah, a hliam neih fo vang hian a theihna tak tak a phochhuak hlei thei lo a ni. Chutih laiin, Europe khawmualpui lama club lian Barcelona leh Juventus te erawh chuan kum 2027 transfer bazar-ah he forward hi Old Trafford aṭanga laksak tumin a dinhmun an bihthla reng nia tarlan a ni bawk.

Tun season chhung hian Manchester United chet ṭhat theih lohna chhan lian bera an sawi zual chu an tlarhnung (backline) derthawn vang a ni ber a, mipui leh chanchinbumite sawi tam ber pawh an defender-te dinhmun a ni ṭhin. Amaherawhchu, tlarhnung chauh ni lovin, United tlarhma (attack) lam pawh an che ṭha tawk lo hle a, khelmualah an buai chho hle a ni.

Goal khung theih loh buaina an tawh zia chu Manchester City nena an inhmachhawn ṭum pawh khan a lang chiang hle a; khelmualah City lamin player an chan a, mi 10 chauhva an khelh chung pawhin United tlarhma hian City lakah goal an thun thei miah lo a nih kha.

Chu mai bakah, ram tana inlan tura an chawlh (international break) hma chiah a Fulham nena an inkhelh ṭum pawh khan, United tlarhma hian hnehna chanpui tham goal an insiam thei lo va. Point khat hlawhchhuak hram tur pawhin khingpuite tawk per (deflection) aṭanga goal lut ringawt an rinchhan a ngai hial a ni. Hetianga goal khung kawnga harsatna an tawh chhoh mek lai leh, Sesko-a'n hliam a tawrh chhunzawm zel lai hian, a hmabak tur chungchang hian Old Trafford lamah sawi a hlawh chho hle a ni.