Brighton leh Manchester City laka a zawnin tlawm tawh mah se, Pathianni khan Manchester United chuan Craven Cottage-ah Fulham chu 1-1 in an inhnehtawkpui a, international break hma hian a zawna vawi thum tlawm an pumpelh hram a ni.

He Premier League inkhelah hian second-half ah Michael Carrick-a naute hian harsatna an tawk hle a. Tlarhnung defender Lisandro Martinez-a'n anmahni goal-ah ball a tihlen palh (own goal) avangin Fulham hian hma an hruai a. Goalkeeper Senne Lammens chuan first-half chhung zawng khan Fulham goal khung tur a lo dang ṭha hle a, mahse Martinez-a'n a tihsual ṭum erawh chuan a dang zo ta bik lo a ni. Chutih rualin United tan Brazilian forward Matheus Cunha chuan an siphurh sutin goal pawimawh tak a khung ta hlauh a ni.

Alvaro Arbeloa enkawl Fulham lakah hian United hian chetṭhatna leh nawrna tak tak an lantir hleithei lova, team khelh dan chu mi tam tak ngaihdan a ni lo hle. October thlaa international break zawha Tottenham an hmachhawn hmain Carrick hian a squad siamṭhat nan hma a lak nasat a ngai dawn tih a lang chiang hle a. United striker hlui Louis Saha chuan Fulham laka United first-team player-te khelh danah ṭhahnemngaihna leh chak tumna tak tak a hmuh loh thu a sawi chhuak a ni.

Sky Sports-a a inlan ṭumin Saha chuan, "Ṭan lak an tum tak tak laite chuan Manchester United team dik tak an ni tih an theihna leh an khelh ṭhat danah a lang chhuak a - harsatna a awm lo, an theihna (quality) a la awm reng. Mahse, eng emaw chang phei chuan charity match (mi ṭanpuina inkhel) ang maia muangin an khel a, hei hi chu thil mak tak a ni.

"Player-te chuan theih tawp chhuaha tlan a, a vawrtawp thlenga khelh an mamawh a ni; minute 70 emaw minute 80 hnuah an theih tawh lo a nih chuan lakchhuah (substitute) zawk tur an ni," tiin a sawi.

Craven Cottage-ah hian United player-te chu khingpuite nawr luih a hnekin mual chhungah an kal mai mai (walking) nia hmuh an ni a. Saha ang chiah hian United defender hlui Ashley Young pawhin Red Devils player-te mual chhunga an "kal vel mai mai" chu a dem hle bawk.

Young chuan, "International break hmachhawn tur atan chuan he result hi a pawimawh em em a ni. Fulham laka draw neih hi point ṭha tak hmuh anga ngaih tur a ni bawk. Mahse an muang mah mah a, ṭhahnemngaihna a tlem lutuk a ni.

"An inrintawk tawk loh vang nge, player-te hian thil an ngaihtuah thui lutuk zawk pawh ka hre lo. An khelh dan a muang lutuk a, player-te phei chu an kal kual vel mai mai a ni! Fulham zawk khan chak ngei an tum a, an duhzawk tih a hriat hle," tiin a sawi zui bawk.

October 10-ah Old Trafford-ah United hian Tottenham an mikhual dawn a, kar thum chhung chu Premier League match an chawl rih ang. An khingpui tur Spurs hi manager Roberto De Zerbi-a hnuaiah league game nga khelh tawhah hnehna la chang lovin, table mawngphahah an ṭhu mek a ni.