Fulham nena 1-1 a an inhnehtawk hnuah, Matheus Cunha-a'n an team-in energy (tha) an nei tawk lo nia a sawi chu Manchester United head coach Michael Carrick chuan a pawmpui loh thu a sawi.
Craven Cottage-ah Manchester United chuan season bul an ṭan ṭhat lohna chhunzawmin, Fulham lakah vanneih asiamin point khat an hlawhchhuak hram a. Red Devils hian inkhelh chhung zawng deuhthaw khan khingpui an khan lo hle a, darkar khat an khelh hnu lawkah Lisandro Martinez-a'n an lamah goal a thun palh (own goal) hlauh bawk nen tlawm mai tur dinhmunah an ding hman a ni. Mahse hun tawp dawn, minute 89-naah Cunha-a shot chu Fulham player per luh tak hlauhah point khat an hlawhchhuak ta hram a ni.
Inkhelh zawhah Sky Sports hnenah Carrick chuan United chu an che muang/thazwi (passive) tiha sawina awmte chu a hnawl a, press conference-ah pawh he thu hi sawi nawnin, Cunha-a ngaihdan chu a pawmpui loh thu a tarlang zui bawk.
Inkhelh leh result chungchang zawhna chhangin Carrick chuan, "Game kan chak lo hi pawi ka ti hle a ni. Chak tumin kan kal a, chak phu tur khawpin thil tam tak kan ti bawk. An goalkeeper phei chu ball a dan ṭhat em avangin Man of the Match a ni hial ang. Vawi hnih lai goal ban kan pet per a, hma hruai zawk awm tak kan ni zawk," tiin chanchinbumite a hrilh.
"An goal khung kha chu thil thleng palh a ni a, chumi hnua kan player-te chet danah khan ka lungawi hle thung. Hun tawp lamah a thleng a, mahse kan naute khan an ngaihtuahna hloh lovin dawhthei takin an khel a. Point kan hlawhchhuak thei ta a ni. A ṭha zawngin inkhel kan khar a, keini tan chuan hmasawnna tlem chu a ni ve chiang mai," a ti.
Chawlhkar tlemte chhung hun harsa an paltlang mek chungchang sawiin Carrick chuan, "A duhawm loh hle mai. Mahse hetiang hi chu engtik hunah emaw a thleng ngei ngei dawn tih kan hria a ni. Everton-in yard 25 aṭanga top corner-a an pet goal te, Man City goal pawm theih loh leh vawiina own goal te hi a pawi hle a. Mahse inkhel hi fine margins (thil te tak te avanga danglam) a ni tlat a ni," a ti bawk.
Cunha-a'n Fulham lamin tha (energy) an ngah zawk nia a sawi chungchang an zawh lehnaah Carrick chuan, "Game kan titawp danah khan energy kan tlachhamin ka hre lo, keima hmuh dan chuan chutiang a ni lo. Game kan titawp danah khan ka lawm hle a, kan chak hmelin kan nawr na hle a ni. Buaina a nih pawh ka ring lo," tiin a chhang.
He inkhelah hian Kobbie Mainoo an lakchhuah laiin mual chhungah fan-te'n an au el (boo) nasa hle a. Hemi chungchangah Carrick chuan, "Inthlakthlengna i siam reng reng hian hetiang boruak hi chu a awm ngei ngei ṭhin. Kobbie khan a khel ṭha a, mahse game-ah khan eng emaw danglam thlentir kan mamawh tawh em avanga thlak kan ni. Chu chu Kobbie pawhin a hrethiam a, inkhelh zawhah pawh ka be tawh a, a ṭha vek e," tiin a sawifiah.
Benjamin Sesko a inhliam tak avangin nipui bazarah khan striker an lak belh loh chu an tisual em tih zawhna chhangin Carrick chuan, "Position pakhatah harsatna a awm avang ringawtin hmun tin atan player i la thut thut thei lo. Ben-a chungchang hi kan la chiang lova, Brighton nena an khelh hnu khan a nâ a ti deuh a, tunah hian kan endik mek a ni. Vawiin atan chuan a inpeih lo chiang a, a khingzang (shin) a na deuh tih bak chu chanchin thar dang sawi tur ka la nei rih lo," a ti.
Manchester United hian an match lehpek chu October 10-ah Tottenham Hotspur an hmachhawn dawn a ni.
