Emirates Stadium-ah Manchester United Women chuan Julia Zigiotti Olme-i goal hmangin hma hruai mah se, Smilla Holmberg-i'n hun tawp dawn minute 95-naah Arsenal tan a rawn sut sak tak avangin 1-1 in an inhnehtawk ta a ni.

He draw avang hian manager Eva Olid-i hnuaia an league hnehna hmasaber chu United hian an hloh ṭhelh a ni a, mahse an match hmasa pahniha London City Lionesses leh Chelsea laka an tlawm hnuah, Olid-i hnuaia United Women point hmasaber a tling thung.

Inkhel ṭan tir lamah mualneitu Arsenal an che na zawk a, Lisa Baum, Mariona Caldentey leh Stina Blackstenius te chuan United goalkeeper Phallon Tullis-Joyce-i an nawr nghal hle. United lam pawhin first half-ah hun ṭha an nei ve tho bawk a, Elisabeth Terland-i ball pet chu Arsenal goalkeeper Misa Rodríguez chuan a zawnin vawi hnih lai a lo dansak a ni.

Second half-ah United chuan goal an khung ta nge nge a. Georgia Stanway-i'n Steph Catley-i pek a tum chu a tisual hlauh mai a, ball chu Zigiotti Olme-i kalsiam remchang takah a kal hlauh a ni. He midfielder hian fimkhur takin Catley-i a bum hnuah, goalkeeper Rodríguez-i kapkarah chiang takin a pet lut ta a ni.

Goal an chhuah hnu hian Arsenal-in United chu an nawr zui nasa hle a, Caitlin Foord-i shot hlauhawm zet chu Tullis-Joyce-i bawk chuan a lo dansak leh a. United tlarhnung lamah Maya Le Tissier, Dominique Janssen leh Anna Sandberg te an inlungrual hle a, United hian an siphurh hum tumin theih tawp an chhuah a ni. Substitution siamin, second half tir lamah Jess Awujo-i aiah Rebecca Bernal an dahlut a, hun tawp dawn lamah Terland-i thlakin Lea Schüller an luhtir bawk.

Mahse, stoppage time minute ngana (95 mins)-ah Leah Williamson-i cross tha zet chu substitute-a lut Smilla Holmberg chuan back post aṭangin a lo pet goal ta hlauh mai a, United player-te rilru a tina hle a ni.

An match hmasa bera goal nga lai an chhuah hnuah, Emirates Stadium-a United chet dan hi a fakawm thawkhat hle a. Tlarhnung venhim kawngah discipline ṭha tak lantirin, ball chang tlem zawk mah se counter-attack hmanga an hlauhawm theih zia an pholang a ni. Tunah chuan Olid-i tan an tlarhnung nghehna hi chhawm nung zelin, chawlhkar lo awm turah khelmuala thununna nei tam thei zawka team ruahman chu a hmabak lian tak a ni chho dawn a ni.