Pathianni khan Craven Cottage-ah Manchester United chuan hun tawp dawn lamah Fulham lakah point khat an hlawhchhuak hram a. Forward Matheus Cunha chuan hun tawp lamah United tana point pawimawh tak chhar chhuak lehin, an head coach Michael Carrick-a mualpho tur chu a chhanhim hram a ni.

Mahse he inkhelah hian mualneitu Fulham chuan Red Devils te chu tlan hnem lamah an khum chiang hle a, United thahrui leh fitness tlakchham zia chu a langsar nawn leh ta a ni. Michael Carrick-a hnuaia tun season-a United khelh dan zawi leh tha thlah lutuk chuan sawisel a tawk chho nasa hle a, Craven Cottage-ah pawh khualmual an nihna ang thovin United team tana tha zawi leh inpekna tlem chu pholanin a awm leh ta a ni.

He inkhel zawhah hian Cunha chuan an khelh dan phung chu a hrethiam lo hle a, United tana khelh zawng zawngte khelmuala an tha zawi lutuk chu a manganpui hle a ni. Khelmuala United tana hero ni zui ta Cunha hian, "Hei hi kan pawm liam mai mai thei lo a ni," tiin an team chet dan chu pawm har a tih thu a sawichhuak a. Khawvela club lian leh ropui berte zinga mi Manchester United tan chuan hetianga thahrui nei lo leh phur lo lutuka khelmuala inlan chu thil theih loh a nih thu a sawi zui bawk.

Fulham lakah an tha a zawih em em chung pawhin Cunha hian a team-te theihnaah erawh rinna a la nghat tlat thung a. Tun dinhmuna an harsatna tawk mek chu an paltlang theih a beisei tlat a, tun season chhung ngei hian an khelh dan phung leh an dinhmun chu a ṭha zawngin an herlet (turn around) leh thei ngei ang tih a la ring fan a ni.

Chutih rual erawh chuan, Carrick-a hnuaiah hian United hian an fitness leh an theihna thehchhuah kawngah hma an sawn vat a nih loh chuan, kumin campaign chhung hian chona khirh tak tak an la hmachhawn dawn tih he inkhel aṭang hian a chiang hle a ni.