Pathiannia Premier League-a Fulham an tlawh hmaa chanchinbumite a kawmnaah, Manchester United head coach Michael Carrick chuan an tlarhnung buaina chu defender-te leh goalkeeper chauhva mawhphurhna nghah tawp tur a nih loh thu leh, team pum anga ṭangruala chinfel a ngaih thu a tarlang.

United head coach hian an match hnuhnung bera an result neih dan te, kum 20 mi defender Leny Yoro-a ṭhan chhoh dan leh Manchester City nena an inhnehtawk ṭuma thutlukna rualrem lo avanga ngaihdam dilna an dawn chungchangte a sawiho a ni.

Tun season-a goal an chhuah hnem tawh chungchang an zawhna chu chhangin, Carrick chuan United hian an duh ang takin bul an ṭan lo tih a pawm a. Team pumah hmasawnna neih a ngai a, he buaina hi defender-te emaw goalkeeper-te chauhvin an tuar tur a ni lo tih a sawi nawn bawk a ni.

Recent match-a an result neih dan avang maia United hian inkhel tawp thlenga hnehna vawn him theih loh (seeing games out) buaina lian zawk an nei hlen anga ngaihna chu Carrick hian a hnawl a. Chanchinbumite chuan City-in mi 10 chauh an neih laia an hneh loh thu leh, Nilaithawhṭannia goal hnih an khung hmasak hnu pawha an hnehna vawng nung zo lova an inhnehtawkpui tak chungchang an sawichhuak a ni. Mahse Carrick chuan hun reilote chhunga thil thleng chu hun rei tak chhung buaina lo awm tawh sa nemnghettu anga ngaih nghal ngawt chi a nih loh thu a sawi.

Match hrang hrangah thil a thlen theih dan leh an insiamṭhat theih dan chu team lamin an hriatthiam a ngai tih Carrick chuan a sawi a. United hian tun hnaiah goal khung hnem ve tho mah se, an attack theihna leh goal chhuah tlem kawngah inkawp zangkhai (balance) ṭha zawk an siam a ngai a ti bawk.

Kar laili inkhela che ṭha tawk lo Yoro leh Ayden Heaven-a chungchang an zawhna chu chhangin, Carrick chuan he rawlthar pahnihte hian inkhel an ṭan tirhin bul an ṭan ṭha hle a, mi dang kalsana anni chauh dem bik tur an nih loh thu a sawi. Hma hun eng tak nei an nih avangin thil ṭha leh hun harsa aṭangte hian an inzir chho zel dawn tih a sawi bawk a ni.

Club-a a season thumna hmang mek Yoro chungchang sawiin Carrick chuan, kum 20 mi defender hian theihna sang tak a nei a, a la inzir chho mek tih a sawi. United tana hetiang rual laia centre-back khelh chu chona lian tak ni mah se, player puitlinna tura hun tiam bituk a awm lo tih a sawi bawk. Player ṭhenkhat chu naupan laiin an puitling hma a, ṭhenkhat erawh kum 20 pelh hnuah an puitling chho ṭhin a ni. Match khat, half khat emaw hun reilote chhunga thil thleng vanga thutlukna hmanhmawhthlak siam lo turin a ngen a, United chuan Yoro hi an ring tawk a ni a ti bawk.

Manchester City laka goal luh pawm a nih loh tur thu pawmpuia ngaihdam an rawn dil chungchangah, Carrick chuan referee enkawlna system-ah rinna a la neih reng thu a sawi a. Chu ngaihdam dilna chuan a taka hman theih lukhawng a neih loh thu sawiin, an tihsual an pawm erawh a zahsak thu a tarlang. Chu thil thleng chuan kha match-ah khan nghawng lian tak a nei tih sawiin, chuti chung chuan tun season chhung zawnga an rilru a khawih buai an remti tur a ni lova, chak zawk nih leh theih nan an rilru an sawrbing a ngai a ni a ti bawk.