Manchester United manager hlui Ruben Amorim chuan January thlasik transfer window inhawn hunah Old Trafford striker Joshua Zirkzee chu lakluh a tum nia tarlan a ni.

January thlaa United-in an ban hma khan Amorim leh Zirkzee te hi Old Trafford-ah an lo thawk dun tawh a. Thla eng emaw zat chawlh a neih hnuah, Portuguese coach hian kumin nipui khan khelmual enkawl hna rawn zawm lehin Italian club lian AC Milan head coach hna a chelh ta a ni. Milan hian Serie A match nga an khelh tawhah pangana dinhmun an luah mek a, thlasik transfer window lo thleng tur atan inbuatsaihna an nei ṭan mek niin a lang.

Italian chanchinbu Calciomercato-in a tarlan danin, Milan chuan Zirkzee hi an lakluh duh zinga mi atan an dah a. United hnen aṭang hian a hnua a ngheta lei theihna (option to buy) zep telin, loan-a lakluh theih dan kawng an zawng mek nia report a ni.

He chanchinbu hian a tarlan zel danin, kum 2024 nipuia Old Trafford a pan hma pawh khan he Dutch striker hian Milan hi a zawm ṭep tawh a ni. Kum hnih liam ta vel khan Serie A club Bologna aṭangin United hian £36.5million sengin an lalut a. Mahse, beisei angin thil a kal tluang ta lo a, he Dutch tlangval hian starting lineup-ah hmun nghet a chang hlei thei lo a ni.

Nipui transfer bazar liam ta pawh khan chhuak mai tur anga sawi a ni a, Italian club Juventus leh Fiorentina te nen pawh inbiakna an lo nei hman a, mahse inremna tak tak a awm theih tak loh avangin United-ah hian a cham zui ta a ni.

Tun season chhungin Zirkzee hian inelna hrang hrangah match li chiah a la khel a, chungte chu second-half substitute-a a luh vek an ni. Inkhelh hun a hmuh tlem em em laiin, striker Brian Bobbley a hliam tak avangin Netherlands national team-ah koh a ni ve leh hlauh a, hei hian mi tam tak a ti-bangbo hle.

United manager Michael Carrick-a lakah vuina leh mawhphurna a nghah loh thu a sawi hnu lawkah a hma hun chungchang hi a rawn ri chho leh ta a ni. Khelmualah hun a chan tlem avangin ram tana koh a ni chu mak a tih thu a zep lo bawk.

United-a a dinhmun chungchang sawiin Zirkzee chuan, "Tun dinhmunah chuan substitute-a rawn luh hi ka dinhmun a ni deuh ber mai a. A tawpah chuan, thil awlsam ni lo mah se keimah ngei hian ka dinhmun siamṭhat nan thil eng emaw ka tih a ngai a ni. Chutiang boruak karah pawh coach-in min han ko ve leh hlauh mai chu ka tan chuan thil mak tak a tling a ni," a ti.

Sawi zawmin, "Koh ka nih hi ka beisei lo hrim hrim. Bul ṭantu ka ni lo tih a chiang reng a, chuvang chuan coach-in ka chungah rinna nghata min ko hi nuam ka ti hle. Mahse, beisei erawh ka beisei lo chiang a ni," tiin a sawi bawk.

Ram tana koh a nih hnu hian kum hnih dawn chhunga a vawi khat nan he striker hian international match a khel leh a. Kar tawpa Netherlands-in 2-1 a Serbia an hneh ṭum khan an chakna goal pawimawh a khung nghe nghe a ni.