Manchester United co-owner leh chemicals giant Ineos dintu Sir Jim Ratcliffe chuan United Kingdom chu a tlakhniam mek thu leh, a ram dinhmunah rinna a neih tawh loh thu a sawichhuak ta.

Britain rama sumdawng hausa berte zinga mi Ratcliffe hian UK tlakhniam chhan ber chu sawrkarin chhiah a lak san lutuk vang leh ram dang aṭanga mi rawn pem lut an tam lutuk vang a nih thu a sawi a ni.

Kum 2020-a UK chhuahsana Monaco-a insawn tawh Ratcliffe hian BBC 'Big Boss Interview' an kawmnaah sawiin, "UK hi hmun nuam leh ropui tak a lo ni ṭhin a. Khawvelah lalram ropui ber kan lo nei tawh a, mipuite pawh mi ropui tak kan ni ṭhin. Khawvel indopui vawi hnih ngawtah kan chak tawh a, mi ṭha leh mi dik tak kan ni.

"Mahse pawi tak maiin, tun dinhmunah chuan UK hi tlakchhiat lam pan mekah ka hria a, he thil hi engtin nge kan dan chah theih ang tih hmuh thiam a harsa hle a ni. Thil pahnih a awm: harsatna khirh tak tak chingfel tur hian politician paukhauh tak tak kan mamawh a, chu harsatna chu eng nge a nih kan hre chiang vek bawk.

"Chu mai bakah, mahni leh mahni party tana ṭha tur chauh ngaihtuah lova, ram pum tana thutlukna ṭha siam ngam politician kan mamawh a ni. Mahse chutiang politician chu hun rei tak chhung kan nei tawh lo a ni," tiin a sawi.

Politician-ten eng thilah nge rilru an pek ber ang tih an zawhna chu chhangin, Ratcliffe chuan ram dang mi pem luh chungchang chu a langsar ber a nih rualin, chhiah san lutuk pawh a tel thu a sawi. Kumin tir lam khan Ratcliffe hian Sky News hnenah UK chu pem lutten an 'awp hneh' (colonised) tawh thu a lo sawi tawh a, mahse he a thusawi hian mi a lo ti-lungawi lo a nih chuan pawi a tih thu a sawi leh a nih kha.

Billionaire Ratcliffe hian North Sea resources-ah sum thehchhuah belh lova, Jackdaw leh Rosebank oil leh gas hmunpuitea thawk tura phalna pek loh chu "aatthlak" a nih thu sawiin, UK-in ram pawn aṭanga energy lakluh a rinchhan lutuk chuan tun thlasik chhung hian gas an tlachham mai thei a ni tih a sawi bawk.

Ratcliffe chuan, "Tun thlasik chhunga kan dinhmun hlauhawm ber chu gas kan tlachham thei hi a ni. Vawh tak zeta khua a vawh phei chuan gas kan tlachham ngei ang a, industry hrang hrangte kan tihtawp a ngai hial dawn a ni," tiin vawikhatna atan a sawi chhuak a ni.

He thu a sawi hma hian Andy Burnham chuan kum 2050 thlengin net zero thlen ngei a tum tlat thu a lo sawi tawh a. Prime Minister pawhin Jackdaw leh Rosebank hmuna hna thawh chhunzawm phalsak chungchangah hian a khawi lam ve ve aṭangin nawrna lian tak a tawk mek a ni. Boruak humhalhtute chuan North Sea-a hmalakna thar tur chu dang turin an ngen laiin, oil leh gas industry te leh opposition politician-te erawh chuan hna sang tam tak a siam theih bakah bills a tihniam dawn tiin an ṭang thung.

Ratcliffe chuan UK chu tun dinhmunah mi hausate lakah itsikna rilru pu angin a sawi bawk a, chu chuan mi hausate chu ram dang pan turin a nawr a ti bawk. "America-ah chuan sum thawkchhuaktute chu an chhuang em em a. Chung sum siamchhuaktute ṭhatna chu an sumte chu an chenna ram economy-ah an hmang leh ṭhin a ni. Mahse UK erawh chuan mi hausate lakah itsikna rilru a pu tlat a.

"Chutiang an tih avang chuan sum siamchhuaktute chu UK chhuahsan turin an nawr a, chhiah chawi san vang emaw thil dang vang emawin an tan awm a hrehawm ta a ni. Chu bakah, khawlai vela thil sual tihna (crime) a sang chho bawk a, hei hian thil a pui lo hle bawk," a ti.

UK-a kir leh a tum em tih an zawhna chu, "Tun dinhmunah chuan tum lo e. Hmasawnna lam hawi a nih ka hmu lo. Sawrkar puihna pek ṭhin (benefits bill) hi a chanvea tihhniam a, chumi aṭanga sum humhim zawng zawng chu robotics leh AI lamah hman nise ka duh zawk a ni," a ti. AI vang hian mi tam takin hna an chan phah dawn em tih an zawh lehin: "Aih, chutiang a ni lo. Kan nunphung thlakthlengtu tur industry lian pahnih chu AI leh robotics hi an ni a, kan nunphung leh hnathawh dan zawng zawng a thlak danglam dawn a, mahse UK erawh he technology pahnihah hian khawiah mah a la awm lo thung a ni," tiin a tlip a ni.