Manchester United ṭantute chu an rawlthar ṭha chungchuang JJ Gabriel-a'n club chhuahsan a duh tih chanchin hriat a nih avangin an thawng hle. He chanchin hi Carabao Cup-ah a debut a siam mai tura beisei a nih ni takah a rawn chhuak lehnghal a ni. Gabriel hi hmun danga insawn a duh avangin Carrington-ah training a zawm tawh lo a, Real Madrid leh Barcelona te pawhin an ngaihven nia sawi a ni.

United defender hlui Rio Ferdinand chuan a YouTube channel-ah he thil thleng chungchang hi sawiin, thil thleng hi thlir thiam a ngaih thu a sawi. Ferdinand chuan, "A hmasa berah chuan, he naupang theihna hi chu a ropui thlawt a ni. A mak zawk, chuvang tak chuan a ni chanchin thar bera a rawn awm ni. A khel lai ka hmu tawh a, training a neih lai pawh ka thlir tawh bawk. Nitina a chetla hmutute thusawi pawh ka lo ngaithla tawh a, he naupang hi chu a chungnung ber thleng tur a ni tih phat rual a ni lo," tiin a sawi.

Ferdinand chuan rawlthar kum 15 mi chauh hian ama duhthu ngawtin hetiang thutlukna hi a siam dawn lo tih sawiin, a chhungte duhdan hriat hmasak a ngaih thu a sawi belh a. "Club chhuahsan a duh chhan hi kan hriatthiam a ngai a ni. Kum 15 mi lek hian ama thutluknain he thil hi a ti lo ang. A chhungkuain ngun takin an sawiho hnuah chhan ṭha tak neiin he thutlukna hi an siam a ni ngei ang. He thilah hian ngaihdan nghet tak kan neih hmain, a chhungte duhdan leh thil dang hriat hmasak phawt a ngai a ni," a ti.

Gabriel hian kum 15 mi chauh la ni mah se pre-season-ah khan United tan substitute-in a lo khel tawh a, club chanchina player naupang ber ni thei dinhmunah a ding hman a ni. Ferdinand hian Ireland-ah pre-season an hman lai khan Gabriel-a'n first team nena training a neih lai a lo thlir tawh a. Chutih laia rawlthar chawimawina an lo pek dan ringawt pawh kha amah ni se cham zui nan a tawk hle tur thu a sawi.

Ferdinand chuan, "Training an neih lai ka thlir a, amah leh Bruno Fernandes chauhvin shooting drill an lo ti dun a. Bruno kha PFA Player of the Year, khawvela midfielder ṭha berte zinga mi a ni a, chutiang lakah chuan shooting drill a lo ti dun a ni. Kum 15 mi lek ni ila, chutiang thil ka tawng a nih chuan keimah atan chuan cham zui nan a tawk hle ang," tiin a sawi.

United-in Gabriel hi cham turin la thlem mah se, Ferdinand chuan rawlthar kum 15 mi duhdan apiang zawm chu club tan thil ṭha lo a nih thu a sawi. "Man United hi kum 15 mi naupangin a duh duha a her kual (bully) tur a ni lo, a theihna a sang hle a nih pawhin. Engpawh nise, Man United hi a tawp thlengin an ding nghet tlat tur a ni. He thil a kal chhoh dan tur apiangah hian, nakinah naupang dang an lo la chhuak leh dawn a, chumi atan chuan hei hi entirna (reference point) a la ni dawn a ni," a ti.

Ferdinand chuan he rawlthar hi sawisel vak a tum loh thu leh, thil thleng chhan leh a bulfike hriat chian phawt a duh thu a sawi tel bawk a ni.