Manchester United rawlthar theihna ngah ber pawla ngaih JJ Gabriel-a'n club chhuahsan a dil hnuah, a chungchanga United dinhmun thar a rawn langzar a, hemi lai hian club dangin lakluh tumin hma an rawn la thar bawk. Tun thla tir lam khan kum 15 mi Gabriel hian rang taka club chhuahsan a dilna (transfer request) a thehluh avangin United hotute chu an thawng hle a ni.
Kum 11 a nih aṭanga United youth academy-a lo awm tawh Gabriel hi club-in rawlthar ṭha ber leh beiseiawm bera an ngaih a ni a. Mahse, amah leh a hnaiahtute chuan Old Trafford chu a ṭhanlenna atana hmun remchang ber a nih tawh loh thu an sawi thung. Champions League match hmasa bera Sabah an hmachhawn ṭum khan head coach Michael Carrick-a'n a chhawr ve loh avangin a chhungte an lungawi lo hle nia hriat a ni a, he match-ah hian rawlthar dang Shea Lacey leh Harry Amass te chuan debut an siam thung a ni.
Tun dinhmunah chuan kumin October thla tawp lama kum 16 a tlin hunah Gabriel hian United nena scholarship contract thar a ziah a rinawm tawh loh hle. Kum 16 a tlin veleh hian EU passport a neih avangin ram dang club a zawm thei nghal dawn a, hei hi EU khua leh tui kum 16 leh 18 inkar tan ram danga insawn theihna dan awm (loophole) remchang a hman theih vang a ni.
Spain chu Gabriel-a kalna tur hmun hnai ber tura ngaih a ni a, Real Madrid leh Barcelona te nen pawh sawizawm an ni mek. Barcelona sporting director Deco-a'n tun kar khan he player hi lakluh an tum lo tih sawi mah se, TEAMtalk-in Catalan club lian hian inbiakna an lo neihpui tawh ngei tih an nemnghet thung. Real Madrid leh Barcelona bakah hian Paris Saint-Germain, Chelsea, Arsenal, Bayern Munich leh RB Leipzig te pawhin he rawtthar hi an ngaihven hle a, Leipzig phei chuan inbiakna an din ṭan tawh nia report a ni.
TEAMtalk-in a tarlan danin, United-in Gabriel hi chelh hram an la tum fan a, mahse a aiawhtute nen inbiaknaah hmasawnna an nei tlem hle thung. England chhungah chuan Chelsea chu dawrtu lian ber ni mah se, Gabriel-a camp chuan Europe khawmualpui lama insawn an duh zawk a ni. He rawlthar hmabak buaipui tur hian Epic Sports agent Ali Barat chu a aiawh ber ni tura beisei a ni bawk.
