Crystal Palace chuan an left-back Tyrick Mitchell-a hmakhua Selhurst Park-ah humhim tumin hma an la chak hle a, he player hian nakkum nipui hian a contract neih lai a hmang zo dawn a ni. Hemi rual hian Manchester United-in he left-back hi an la thlithlai reng thung.
Football Insider thudawnna tarlangtu The Peoples Person-in a ziah danin, Palace-in Mitchell-a contract thar ziahpui tur hian ruahmanna an kalpui chak hle. Palace chairman Steve Parish-a'n club-a chelh ngheh an duh bik player pakhat emaw pahnih emaw a thlang chhuak a, chung zingah chuan Mitchell-a hi a hmasa ber a ni.
Old Trafford club-in Mitchell-a hi an ngaihven thar a ni lo. United-in tlar hnung veilam (left-back) buaina chinfel nan he Palace player hi an lo sawizawm ngut ngut tawh a. INEOS-in nikum nipui transfer bazar lai khan he position thuam chak hi an ngaihpawimawh hmasak ber zinga mi a ni a, mahse tlar laili (midfield) thuam ṭhat hna an thawh hmasak tak avangin an lo dahṭha rih a ni.
United tlar hnung veilam buaina hi a la reh chuang lo. Luke Shaw-a dinhmun a la chian loh bakah, United-in Newcastle United left-back Lewis Hall-a pawh an lo thlithlai tawh a, mahse Hall-a'n St James' Park-ah a hmabak a tihtluk tak avangin Mitchell-a hi an tana remchang ber tur a ni chho ta a ni. Mitchell-a hi Premier League-a lo che ṭha tawh sa a nih bakah, a contract-ah kum khat chiah a bak tawh avangin United tan pawh lakluh a rem hle.
Palace-in hmanhmawh taka contract thar ziahpui an tum chhan pawh United nena sawizawm a nih vang a ni a. He full-back hian Manchester United zawm a chak hle nia sawi a awm bawk nen, Palace-in a thlawna chhuahtir mai aiin hma lak vat an thlang ta zawk a ni.
Mitchell-a'n contract thar ziah duh lo mah se, Palace-in kawl an la nei thung; a contract neih lai hi kum khat dang pawhsei theihna (option to extend) an kawl a ni. Hei hian United-in a thlawn emaw, man tlawm tea lakluh an tumna kawng chu a tibuai thei dawn a ni.
Tun dinhmunah engmah a la chiang lo. Palace-in hma lak chak viau mah se, Mitchell-a'n contract thar hi a ziak nghal dawn nge, United-in an dawr hun nghakin a ngawi rih dawn tih erawh hriat a la ni lo.
