Denmark leh Nations League an khelh laiin, Manchester United defender Patrick Dorgu chu a malpui hnung lam (hamstring) hliam nia hriat avangin minute 29-na lekah khelmual aṭanga lakchhuah a ngai a, hei hian Manchester United-ah hliam chungchangah rilru buaina a thlen nghal a ni.

Kum 21 mi rawlthar hi amah hnaihtu khingpui tumah awm lo chungin a malpui hnung lam vuanin a tlu a, hemi hnu hian ram tana thawkho staff-te puihnain mual a chhuahsan a ni. A hmunruak luah tur hian Mohammed Daramy chu luhtir a ni zui bawk. Dorgu-a hliam nasat dan tur hi thuchhuah nemnghet a la awm lo na a, mahse amah chauhva a tluk dan leh a malpui a vawn dan en khan Carrington-ah United hotute ngaih a tiṭha lo hle dawn a ni.

He hliam hian Denmark tana a inlan ṭhat chhoh lai tak a nang a, Norway nena an inkhelh ṭum pawh khan Dorgu-a'n chance vawi thum ngawt siamin, mualchhunga chance siam hnem ber a lo ni hman a ni.

United manager Michael Carrick-a tan tlar hnung veilam (left-back) hi a enkawl tirh aṭanga a luhaisaktu ber a la ni chho reng a. Luke Shaw-a'n fitness ṭha a neih hleithei loh bakah Manchester derby hial a lo hmaih tawh avangin, Carrick-a chhawr theih tura left-back nghet awmchhun chu Dorgu-a chauh hi a ni tawh a ni. Noussair Mazraoui-a chu hmun hrang hranga khel thei ni mah se, Dorgu-a hi mual veilam sirah chuan a rintlak zawk hle. Chuvang chuan, he Danish tlangval hian hun rei tak chawlh a ngai a nih chuan, Shaw-a hmabak a la chian loh bawk si avangin Carrick-a tan tlar hnung siksawi kual vel a ngai leh dawn a ni.

Dorgu-a hliam chauh hi kumin international break chhunga United buaina a ni lo. Portugal tana Wales hmachhawnnaa inlan Bruno Fernandes-a chu hun tawp thleng khel mah se, an head coach Jorge Jesus-a'n he midfielder hian a hông (hip) hliam vangin match thum chhung zet na tuar chungin a lo khel tawh tih a sawi chhuak a, hei hi thil ngaihtuahawm tak a nih thu a sawi bawk. Hemi avang hian Norway nen an inkhelh turah Fernandes-a hi a inlan dawn lo a ni.

Hemi bakah hian, Benjamin Sesko-a pawh a ngawn hliam (shin injury) a chhuah leh tak avangin Slovenia squad aṭangin a inhnukdawk bawk. Heng hliam hrang hrangte hian inzawmna nei lo mah se, international break zawha club duty hmachhawn leh tur Carrick-a tan chuan chona lian tak leh hna hautak tak a tling khawm dawn a ni.