Manchester United sporting department chuan tlarhnung thuamṭhat nan player thar pathum lakluh an tum mek a, chung zingah chuan Newcastle United left-back Lewis Hall leh AS Roma right-back Wesley te chu an thlitsawk zingah an tel a ni. Theatre of Red-a Shaun Connolly-a'n a tarlan danin, INEOS-a'n mual sir tuak tuakah tlarhnung thar lakluh a duh bakah, hmachhop thui tak an neihpui Leny Yoro-a leh Ayden Heaven-a te bula khel tur centre-back thar pakhat lakluh a tum bawk a ni.
Kum 22 mi Hall-a leh kum 23 mi Wesley-a te hi full-back position tana an hming chhawpchhuah hmasak te an ni a. Mahse, he report hian a tarlan dan chuan, heng inbiaknaten hma an lak dan hi club chhungrilah Omar Berrada-a leh Jason Wilcox-a te hmalakna chauh a la ni a, inremna hnai tawh lutuk erawh a la awm rih lo a ni.
He hmalakna hi a awm lo hran lo hle. United-in nipui liam ta khan tlar laili (midfield) thuamṭhat hna an thawk a, a hma kumah tlarhma (attack) lam an lo thuamchak tawh bawk a, tlarhnung erawh an la khawih danglam lo thung. An ruahmannaah chuan nipui lo thleng tur hian tlarhnung hi fel fai taka thuamṭhat an rilruk a ni. Mahse, he report tarlan a nih lai hian United-in Premier League-ah clean sheet an la neih miah loh avangin, tlarhnung khawih danglam loh an thutlukna hi a rintlak loh tial tial niin a lang.
Hall-a hian Newcastle-ah contract thar hun rei tak daih a ziak fel chiah a, mahse Connolly-a report chuan United chhungril thudawnna pakhat chuan he player hi an lakluh theih mai an la inbeisei tlat tih a tarlang. Hall-a transfer hi a hlawhtling thei lo a nih chuan, Crystal Palace left-back Tyrick Mitchell-a chu thlan tur dang rintlak tak a ni a. Selhurst Park-ah hian Mitchell-a contract hi tun season tawpah hian a tawp dawn a, mahse Palace-in kum khat dang pawhsei theihna option an kawl thung a ni.
Mual dinglamah thung chuan, Wesley-a hian Carrington-ah ngaihsantu a ngah hle a, a bikin Michael Sansoni-a department chhungah a tla tlum hle. Wesley-a hi hmanga tlarhma nawr pui thei wing-back hlui, United full-back ropui tak takte ang kha a ni a. Season liam ta khan Serie A-ah Roma tan match 30 inlanin goal 5 a khung a, tun season-ah pawh assist pakhat a nei leh tawh a ni.
Tlarhnung laili (centre-back) hmun ruak atan erawh, Everton defender Jarrad Branthwaite-a leh Nottingham Forest player Murillo-a te chu Wilcox-a leh a recruitment staff-te'n uluk takin an thlithlai mek a ni.
Tun dinhmunah hian dawrna pangngai (formal approach) a la awm lo va, United-in Wesley-a bakah hian ram chhung leh Europe khawmualpuia right-back ṭha dang pawh an thlitsawk nual bawk. He an player duhte lakluh nana hma an lak tak tak dawn leh dawn loh erawh tun season kal lai boruak a ziaawm hnuah chauh a hriat chhoh rin a ni.
