Manchester United leh an hmelma hlun Liverpool-te chuan Gambia rawlthar thiam Alieu Saine lakluh tumin hma an la dawn nia report a ni. Kum 16 mi winger Saine hian tun hnaiah chet ṭhat em avangin Europe club liante ngaihven a hlawh hle a, Premier League club lian pahnihte hian he rawlthar hi an tlarhma thuam nan lakluh an duh hle a ni.
United hian kar tlemte liam ta chhung khan rawlthar ṭha zawn hna (talent hunt) an kalpui nasa hle a, an academy thuamchak tumin hma an la chak hle. INEOS chairman Sir Jim Ratcliffe-a'n hma a lak hnuah, United chuan nakina khawvela player ṭha ber (world-class) ni thei tur rawlthar lakluh leh chherchhuah chu an ngaihpawimawh berah an dah a ni. Red Devils hian tun hnai khan Manchester City aṭangin David Eze leh Leicester City aṭangin Manuel Appiah Boakye te an lo la tawh a. Hemi bakah hian City aṭang bawkin Karim Cassim an la a, kar liam ta khan Liverpool aṭangin winger naupang Isaac Konde an lakluh thu an nemnghet bawk. Heng player-te hi nipui transfer bazar laia Tottenham Hotspur aṭanga an lakluh Tynan Thompson-a rawn zuitute an ni.
Football Insider-in a tarlan danin, United leh Liverpool-te hian Saine-a khelh dan hi an thlithlai reng a, Europe club dangte pawhin an ngaihven hle. Kum 16 mi winger hian tun hnaia WAFU Zone A U-17 tournament-ah Gambia U17 national team chu champion puiin a che ṭha hle a, he inelnaah hian goal khung hnem ber (top scorer) a ni bawk. United leh Liverpool scout-te chuan he inelna hi va hmunin rawlthar ṭha zualte an va thlithlai a, Saine-a chet dan hian an mit a la hle nia report a ni. Thudawnna dangte chuan Portuguese club lian Benfica leh La Liga club Celta Vigo-te pawhin Saine hi an ngaihven hle a, a hmasawnna hi an thlithlai reng tih an tarlang bawk.
Peter O'Rourke-a'n a tarlan danin, United leh Liverpool-te hian Saine hi nakina khawvel star lian tak ni thei tur khawpa theihna nei angin an ngai a ni. WAFU Zone A U-17 tournament-a a chet ṭhat em avang hian a hlutna pawh a sang chho hle a. Football Insider-in a tarlan danin, Saine leh a khelhpui Omar Marong te chu Gambia senior national team nena training nei dun turin koh an ni hial a, hei hian an ram chhungah pawh an ngaihsang hle tih a tilang chiang a ni.
United hian Africa khawmualpui aṭanga rawlthar ṭha lakluh hi an ngaihtuah thar hle a, Saine-a kum leh a theihna thlir hian United-in player an zawn dan phung nen a inmil hle a ni. Mahse, tun dinhmunah chuan inremna puitling a awm dawn em tih erawh sawi lawk a la harsa hle rih a, club pahnihte hian he rawlthar chungchangah hian hma an la sawn zel rih tura ngaih a ni.
