Manchester United chuan transfer window inhawng leh tur nghakhlel takin left-back thar zawn hna an thawkrim hle a. A nihna takah chuan, Luke Shaw-a thlaktu tur rintlak tak lakluh hi nikum nipui transfer bazar chhung khan an lo tihfel tawh tur a ni a, mahse an lo ti lo kha thutlukna siam sual lian tak a ni tih a lang chiang ta hle. Tun hnaia ram tana chawlh (international break) an hman chhung khan Shaw-a thlaktu tura an chhawr thin Patrick Dorgu leh Noussair Mazraoui te chuan hliam an tuar ve ve a, hei hian United tlar hnung dinhmun a tiderthawn hle a ni.

Heng hliam neite avang hian rawlthar Harry Amass-a tan senior team-a inlan theihna hun remchang a inhawng dawn a. Mahse, Amass-a'n hma sawn mah se, United hian nakin zela Shaw-a hmunruak luah thei tur khawp player tha bik lakluh an mamawh tho a ni. Chuvang chuan Red Devils hian Adrien Truffert, Tyrick Mitchell leh Alejandro Balde te chu an lo thlithlai tawh hlawm a. Mahse, tun hnaiah chanchinbu thar Fussball-in a tarlan danin, Bayer Leverkusen tana che tha em em, "assist king" tia an sawi hial Miguel Gutiérrez chu United hian an ngaihven thar hle a ni.

He Spanish left-back hian Napoli aṭanga Bayer Leverkusen a zawm hnuah bul a tan tha hle a. Match li a khelh tawhah goal khat khungin assist vawi thum lai a nei hman a, a chet that em avang hian chanchinbu hrang hrangah a hming a ri nasa hle. German chanchinbu chuan, "Manchester United pawhin he Spanish player hi an player lakluh duhte list-ah an telh ve a ni. Red Devils hian tlar hnung veilam (left-back) aṭanga tlar hma tichak thei tur player tha an zawng a, Leverkusen-ah a tlangnel hma em avang hian Gutiérrez-a chet vel dan hi an thlithlai reng a ni," tiin a tarlang.

Gutiérrez hi United chauh hian an ngaihven lo thung. Fussball-in a tarlan danin, Real Madrid, AC Milan leh Juventus Turin te pawhin kum 25 mi hmasawnna hi an thlithlai reng a ni. United neitu thar INEOS tan left-back lakluh hi an ruahmanna lian ber a nih avangin, an team project nena inmil ber tur player lakluh nan hian an theihna zawng zawng an hman a beiseiawm hle. Chuvang chuan, Gutiérrez-a hi an thlang a nih chuan United hian lakluh ngei tumin hma an la nasa dawn a ni.

Heti a nih rual hian, kumin nipui liam ta chiah khan Leverkusen hi a zawm a, contract rei tak a la neih bakah club lian dangte'n an ngaihven ve reng avangin, English champion vawi 20 lai ni tawh United tan he transfer tihpuitlin hi thil awlsam erawh a ni dawn lo. Tun dinhmunah chuan an ngaihvenna hi a la tir hle a, Leverkusen lam pawh dawrna pangngai an la hmu rih lo a ni. Gutiérrez-a chet that em avang hian Europe club liante mit a la hle a, mahse Leverkusen a zawmna a la rei loh avangin kuminah chuan a chhuak mai rih lo tura ngaih a ni.