September thlaa ram hrang hrang match (international break) khelh zawh hnua Premier League khelh chhunzawm a nih hmain, Manchester United-in an player khel tlem leh hliam aṭanga rawn dam chhuak hlimte chu khelmuala inlantirna hun ṭha tak an nei dawn ta. Red Devils-ten tun kar hian an unau club, INEOS thununna hnuaia awm tho Swiss club FC Lausanne-Sport chu Carrington-ah inkharkhipin friendly match an hmachhawn dawn a ni.

He match-ah hian ram tana khel tura koh ve loh player-te leh academy aṭanga first-team luh tuma hma la mek rawltharte chuan inlan nan hun ṭha an hmuh beisei a ni. Chutih rualin, head coach Michael Carrick-a'n hliam aṭanga rawn kir leh mek player-te dinhmun fiah nan he hun hi hman a tum a, October ni 10-a Tottenham Hotspur an hmachhawn hunah an inpeih hman dawn em tih a thlir dawn a ni.

Inlan duh hle zinga mi chu Amad-a a ni a, kumin nipui transfer bazara INEOS-in player an lakluh zinga man to ber Carlos Baleba pawh a tel bawk. The Athletic-in a tarlan danin, Brighton midfielder hlui Baleba-a hi a beisei aiin a dam chak zawk a, Carrington-a coach-te pawhin a thawhrimna leh a inpekna chu an fak hle nia report a ni. He defensive midfielder hian Swiss club lakah hian United tana a vawikhatna atan minute tlem a hmuh ngei a rinawm.

He match-ah hian hliam dang tawk lova a khel tluan thei a nih chuan, Carrick-a'n Old Trafford-ah (mahni mualah) an hmelma lian Tottenham laka a debut a siamtir theih ngei a rinawm ta a ni.

The Athletic-in, "Baleba, kum 22 mi hi a beisei aiin a hliam aṭangin a dam chak zawk a, ram tana an chhuah hma chiaha Fulham nena 1-1 a an inhnehtawk ṭum pawh khan matchday squad-ah a tel hman hial a ni. A thawhrimna hian staff-te a hneh hle. Tun season-ah khelmualah minute khat pawh a la hman loh avangin, tun inelnaah hian Cameroon-in Africa Cup of Nations qualifiers khel turin an ko tling lo a, mahse tun kar tawp lama United academy team-in Switzerland club Lausanne-Sport an hmachhawn hunah erawh a inlan ve maithei a ni," tiin a tarlang.

Carrick-a'n he Cameroon international hi a lo mamawh tawh hle a, tlar lailiah Youri Tielemans leh Kobbie Mainoo te inkawp chuan khingpuite dan chawt kawngah harsatna an tawk nasa hle a ni. Carlos Baleba-a'n tlar lailiah chakna leh thahruai thar a rawn thlen dawn a, tlarhnung venhimna kawngah pawh a ṭangkai hle ang. Hei hian tun season-a United-in taksa fitness lamah harsatna an lo neih tawh ṭhinte pawh a siamṭha ngei tura beisei a ni.