Premier League chhungah thil thleng lian tak a awm a, Manchester City chu pawisa hman dan dan bawhchhiatna (financial breaches) vawi 115 ngawta puhnaah independent Commission chuan an thiam loh a chantir ta a ni.

Manchester City lam hian he thutlukna siam a nih avangin an pawi tih thu leh mak an tih thu official thuchhuah siamin an tarlang a, October ni 2, Zirtawpni thleng zualko (appeal) a, he thutlukna hi dodal theihna hun an nei a ni.

Manchester United leh Republic of Ireland captain hlui Roy Keane chuan he thiam loh chantirna thlengah hian a thinrimna leh a lungawi lohna a phochhuak nasa hle. ITV Sport-a a sawinaah, Keane chuan Abu Dhabi lamin club an takeover hnua Manchester City thilawmdan chu a rapthlak a tih thu leh, he club tana lo khel tawh player-te chu club hotuten an bum tlat a ni tiin a sawi.

Keane-a hian 2009/10 leh 2017/18 inkara City-in hlawhtlinna an neih chhunga medal an lakte chu paih thla turin player-te a hrilh a ni. "Engati nge hria chhuak ta se mi tam tak an rilru a na dawn tih hre reng chungin an lo tih luih? Kei hi hetiang hlawhtlinna leh faka awm lo chelh a, he club-a lo khel tawh player ni ta ila, ka medal dawng tawhte hi 100% in bawlhhlawh bawmah ka paih ngei ang," tiin a sawi.

City player-te chu phatsana awm anga an inngaih a ring em tih zawhna chhangin Keane chuan, "Oh, 100%-in an inngai ngei ang. Hei hi inbumna lian tak a ni. Player hlui ṭhenkhatin 'khelmual chhungah chuan an chak tho alawm' an lo ti mai mai hi ka hria a, awmze nei lo a ni. Helaiah hian inbumna lian tak a thleng miau a ni," a ti.

Manager leh player-te tan hmalam pan a harsa dawn tih sawiin Keane chuan, "Awmze nei taka thawhhona leh rinna an lo neih tawhna zawng zawng pawh a chhe vek tawh a, inbum nuam titu neitute awmna club-ah hian hetiang hlawhtlinna sang chelh zui zel hi player-te tan a khirh em em dawn a ni," a ti bawk.

Arsenal star hlui Ian Wright pawhin ITV Sport studio-ah hian Man City thilawmdan chu a dem hle a. Wright chuan, "Club hotute hian player-te leh fan-te hnenah engmah thil dik lo a awm lo tiin an hrilh a, an ni pawhin an awih em em a ni. Mahse tunah eng nge thleng ta? Puhna 115 ngawt an hmachhawn ta mai a ni. Player i nih chuan thil fel lo a awm tih i hria ang. Thil thleng mek hi khawvel football-ah a la thleng ngai lo a, thil pawi tak leh pawi kan tihpui vek a ni. Mahse, club neitute thil tih hi chu a rapthlak takzet a ni," tiin a sawi chhuak ve bawk.

Tunah hian City-in appeal an thehluh tirh aṭanga hremna (sanctions) an hmachhawn tur thlengin football khawvel chuan thutlukna thar an nghah reng rih a ngai dawn a ni.