League table-in dawt a sawi ngai lo tih ṭawngkam hi tunlaia football khawvela data leh analytics a rawn larpui hnu hian pawm zui zel a harsa tawh hle a; match 38 khelh zawh hnuah pawh dawt tlem a la tarlan theih chuan, match nga chauh an la khelh laia table dinhmun en phei chu rintlak a ni lo hial a ni.
Football huanga awmte chuan inelna kal mekah match 10 tal an khelh hma chu table dinhmun hi ngaihsak loh an duh tlangpui ṭhin a. Season bul ṭannaah hian team dinhmun dik tak tarlang lo thei thil tam tak a awm thei a, a bikin nipui World Cup zawh hlim phei chuan a dik lo lehzual fo ṭhin a ni.
Manchester United pawhin chutiang boruak chu a nih ngei an beisei ang. Ram tana match khelh tur avanga chawlhkar thum chhung chawlh an neih hmain, Michael Carrick-a enkawl United hi match nga an khelh aṭangin point nga chauh hmuin 12-na dinhmunah an awm mek a ni.
United tana ngaihtuahawm zawk chu tun thlenga an tawn te hi tumpui harsa lutuk an la ni lo hi a ni a. Mahse, Carrick-a'n a lo sawi tawh angin, thil tenau te tein an kawng an dahlau ṭhin a ni. Chung zingah chuan Everton-in goal ropui lutuk pahnih an pet luh te leh, Manchester City laka an tlawm ṭuma pawm loh tur khawpa ngaih chakna goal an chhuah te chu an chak loh chhan lian zinga mi a ni.
United hotute chuan chief executive Omar Berrada leh director of football Jason Wilcox te mit hmuh nena inmil turin data endik hna an thawk mek ngei ang. Ineos hnuaiah United hian Mercedes F1 team-a number leh data lo khawih tawh ṭhin Michael Sansoni-a kaihhruaina hnuaiah data leh AI department thuam nan sum tam tak an seng tawh a ni.
University of Southampton aṭanga zir chhuak Sansoni hian United tana thil vanduaithlak thlengte hi data hmangin a sawifiah thei a, Carrick-a laka rinna nghah tlat chu a hnuah rahṭha a la chhuah ngei ang tih pawh club hotute hnenah a thlen theih phah a ni. Kum 45 mi Carrick hian a hna a la chan nghal dawn lo a, mahse tun season kal mekah a laka beiseina leh nawrna erawh a sang tawh hle thung.
Engpawh nise, Carrick-a'n thil tenau te tein an tlin lohna a tarlang ṭhin a tih hi a dikna chen a awm a ni. Manchester City lakah point 10 ngawtin hnufual tawh mah se, an khelmual chhunga data erawh chuan beiseina ṭha zawk a la pe thung.
Tun season Premier League-ah hian khingpuite penalty box chhungah ball tawk (touches in opposition box) ngah ber chu United an ni a, vawi 182 lai an khawih tawh a ni. Chu bakah pass dik ngah lamah league-ah pahnihna an ni mek bawk a, hei hian Carrick-a duhdan, ball vawn tam (possession) chu player-ten an man ṭan hle tawh tih a tilang a ni.
Goal zawn pet (shots on target) lamah pawh tun season-ah pahnihna an ni a, mahse goal-a an chantir theih zat (conversion rate) zaa 7.1 chauh a nihna erawh an chhehvela team dang Brighton (16.8%), City (19.1%) leh Chelsea (13.9%) te ngaihtuah chuan a hniam hle thung.
Goal khung theih dan tur beisei zat (expected goals / xG) ah pawh United hi 9.9 neiin palina an ni a, mahse vawi riat chiah goal an la khung a ni. An xG difference hi 3.3 lai a nih laiin, a taka an goal difference chu zero (0) chauh a ni a; hei hian an theihna phu aia tlem khungin, an chhuah tur aia tam goal an chhuah tih a tarlang chiang hle a ni.
Carrick chuan heng data leh khelmual chhunga result-te hi an la inbuhpêt chhoh ngei a beisei a. Season a kal zel rualin league table-a an dinhmun hian hetiang number leh data hian a rawn phawk chho tial tial ṭhin a ni.
Old Trafford data lab aṭanga thuchhuah pawh hei hi a nih ngei a rinawm. Thil hlauhthawnawm ber chu, pressure a san chhoh a team rilru a hniam zel chuan hetiang statistical chhinchhiahna ṭhate hi a thamral mai ang tih hi a ni a; mahse tun dinhmunah chuan United hian hmalam beiseina ṭha tak an la nei a, Carrick-a lakah pawh an la lungawi tawk a ni.
