Kum 15 mi rawlthar JJ Gabriel chuan a Instagram account-a thlalak zawng zawng a nuaibo vek hnu ni 14 lekah, thlalak pahnih a rawn tarlang kir leh ta. Rawlthar hian a follower 862,000 zet te hnenah a training velna video chu a Instagram story-ah a rawn tarlang bawk a ni.
Manchester United academy-a rawlthar che ṭha tak Gabriel hian, kumin thla tir lam khan club chhuahsan a duh thu sawiin, Real Madrid, Barcelona leh Bayern Munich te nena sawizawm a nih hnuah a super agent Ali Barat a rawih tak avanga thawm a chhuah vak khan a Instagram-a a thil tarlang tawh zawng zawngte chu a lo nuaibo vek tawh a ni.
Mahse, tunah chuan a thutlukna puiting lehin, a thlalak lo tarlang tawh zing aṭanga pahnih chu a rawn dah kir leh ta a ni. Instagram hian thlalak archive-a dah a, duh huna tarlang kir leh theihna kawng a siamsak ṭhin a; chutiang chiah chuan a tih reh tawh pawh ni 30 chhungin a rawn dah kir leh theih bawk a, Gabriel-a'n he mi zinga a khawi zawng hi nge a hman tih erawh chian a la ni lo.
Gabriel-a'n a Instagram-a a rawn dah kir tak thlalak pahnihte hi a football career chhinchhiah tlak tak pahnih pholangtu an ni. A hmasa ber chu Nike Football nena hun rei tak daih tur contract an ziah ṭuma a hming a ziah lai leh an studio-a a lak a ni a. A pahnihna chu 2025/26 season-a U18 Player of the Season Award a lak ṭuma England striker hlui Alan Shearer-a nena lawmman chawi chunga an lak a ni thung.
A story-a a tarlan training clip hi football coach Jack Hunter (social media-a @players_plus ti-a hriat) upload sa a ni a. He video-ah hian Gabriel hian yard 25 vela thui aṭangin free-kick vawrh kawh tak tak leh mawi tak tak, goal vengtu leh bang lo siamtu player-te kân tirin goal-ah a pet lut zawn zat zat hmuh tur a awm a ni.
Gabriel hi Carrington-a training zawm tawh lovin, a hmakhua tur a ngaihtuah mek lai hian ama mialin training a nei mek nia tarlan a ni. Barcelona lam chuan he rawlthar hi lakluh an tum rih lo ni a hriat a ni a, mahse an sporting director Deco erawh chuan Gabriel-a pa hi a la inbiakpui reng thung.
He thil a thlen hma thla tlemteah kha chuan Gabriel hi club-a a dinhmunah a lungawi hle nia ngaih a ni a. Academy Awards-a a ṭawngchhuahnaah, "Ka football zinkawng-a tun thleng min puihtu Pathian leh ka chhungte chungah lawmthu ka sawi duh a ni," tiin a lo sawi tawh a ni.
Sawi chhunzawmin Gabriel chuan, "Ka thiltum ṭhenkhat ka hlawhtlin theih nana season tluan a min puihtu ka team-mate te leh coach-te chungah pawh lawmthu ka sawi a ni," tiin, U18s coach Darren Fletcher-a nena an thawhdun dan chu a nuam a tih thu a lo sawi tawh bawk.
