Premier League dan bawhchhiatna avanga City khingtu independent panel thutlukna a chian phawt chuan, Manchester United chuan an khawpui pui Manchester City lakah zangnadawmna (compensation) pound maktaduai tam tak an phut thei dawn niin sports dan lam thiamte chuan an sawi.
Premier League-in Manchester City laka thubuai 115 a thehluh zinga 114-ah City hi thiam loh chantir tura ngaih an ni a. Mahse City lam hian he thubuai hi a la tawp loh thu leh, an laka kal thutlukna apiang chu an khinglet (appeal) nghal zel dawn tih an lo nemnghet tawh bawk a ni.
Independent panel thutlukna leh a chhan leh vanga an thuziahte nghah meuh laia hian, kum 2009 leh 2018 inkara sum hman dan khapna bawhchhe tu City laka zangnadawmna phut theih dan kawngah Premier League club dangte pawhin dan lama an dinhmun an bihchiang mek hle. Thiam loh chantir an nih chuan khelmual lama hremna (sporting sanctions) pek an nih bakah, club dangte hian sum lama zangnadawmna an phut zui thei bawk dawn a ni. United hi hetiang zangnadawmna phut theihna hun tiam (statute of limitations) a liam hmaa ngenna thehlut ve tura dikna hauh sa club pali zinga mi an ni.
Appeal thubuai zawh fel hmain eng zangnadawmna mah ngaihtuah theih a la nih hmel loh a. Mahse Three Points dintu pakhat leh sports dan lam mithiam Tom Murray chuan United ang club-te tana thil fiah ngai turte a sawifiah a ni. Murray chuan, "A hma chuan club pakhatin club dang lakah zangnadawmna an inchuh ngai meuh lo. He thilah hian a khirh ber chu thil thlen chhan (causation) fiah hi a ni. City hian Premier League dan hi lo bawhchhe lo ta se, eng nge thleng ang tih hi ngunthluk tak leh felfai taka chhut chhuah a ngai a ni," tiin a sawi.
"City hian dan lo bawhchhe lo se chuan club pakhat khan Premier League an la emaw, Champions League an inlan dawn em tih fiah a ngai dawn a. Chutiang chhut chhuah chu thil harsa tak a ni. Player leina tur sum nei tlem ni ta se la, khelmualah an hlawhtling lo zawk ngei ang tih a sawi theih ngawt bik loh. Squad-a sum hman leh khelmuala hlawhtlinna hi inzawmna nei mah se, a chhan leh vang inzawm tlat a ni kher lo," a ti bawk. Club-te chuan dan bawhchhiatna avangin khelmualah hlawkna an hmu a, chu hlawkna avang chuan club dangin sum leh pai lamah hloh an nei tih an fiah a ngai a ni.
June thla liam ta khan Burnley chuan Everton lakah sum hman dan bawhchhiat avangin zangnadawmna an phut a, £35 million lai an hmu a nih kha. Everton hian appeal mah se, he thil hian club dang laka zangnadawmna phut theih a nih zia a pholang a ni. City thubuai huam chhung hian United chu vawi hnih ngawt City dawtah pahnihna an lo ni tawh a, 2015-16 season khan goal difference vang liau liauvin City hnenah Champions League hmun an lo hloh tawh bawk. 2011-12 season-a title an inchan loh dan pawh kha goal difference bawkin a ni.
Murray chuan margin a zim em avangin heng season-te hi claim siam nan a awlsam dawn tih sawiin, point 19 ngawta City-in title an lak khum 2017-18 season ai chuan fiah a awlsam zawk fe dawn tih a tarlang. Zangnadawmna claim theih hun tur hi thla eng emaw zat emaw kum hial emaw a la duh maithei a, mahse United ang club tan chuan pound maktaduai tam tak an hmuh theih a rinawm a ni.
