Erik ten Hag-a'n Manchester United a enkawl chhung khan thil tam tak sawisel tawk mah se, Kobbie Mainoo-a theihna a chher puitlin dan erawh club chanchina a sulhnu ropui ber zinga mi a ni. Kum 16 mi a nih laia Mainoo-a theihna hmu chhuaktu niin, kum 17 a tlinin debut a pe a, kum 18 a nih meuh chuan khawvel hriata player ṭha berte zinga mi a nihtir hman a ni.

Amazon Prime Video Sport-a Clarence Seedorf-a nena an inkawmnaah, Mainoo chuan kum 16 leh 17 mi a nih lai khan first-team training hautak leh inelna sang tak chu a lo zawm ṭhin thu a sawichhuak a. He England international hian Ten Hag leh a assistant coach Mitchell van der Gaag-a te kaihhruaina hnuaia training sessions khauh tak tak a hmachhawn ṭhinna khan Premier League boruak harsa hmachhawn turin nasa takin a buatsaih tih a tarlang.

Mainoo chuan a hun kal tawh sawiin, "Kum 16-17 ka nih lai khan nitin first team nen kan train ṭhin a. Raphael Varane, Casemiro leh Bruno Fernandes te bula awmin, ball tlan chak zawng leh boruak nena inmil turin theih tawp ka chhuah ṭhin a ni. Erik ten Hag leh Mitchell van der Gaag te awm lai khan training kha a hautak hle a, ka la telve tawhna zinga session ṭha ber pawl an ni. Kha mi laia training khauhna leh inelna sang tak khan min pui em em a ni," tiin a sawi.

He thu a sawichhuah lai hian, Manchester United head coach Michael Carrick-a hnuaia training kalpui dan chu sawiselna a tawk chho mek thung. Carrick-a hnuaiah hian training a khauh tawk lo nia hriat a nih bakah, team chu tharum leh taksa insiamremna (fitness) lamah Premier League inelna sang phak lo tura hmuh an ni a. Chutih laiin, Ten Hag-a hnuaia Mainoo-a'n match a khelh hmaa first team training hautak tak a lo hmachhawn hrep khan vawiina player langsar a nih theih nan a chher hriam ta hlauh a ni.

He thil hian United rawlthar ngaihven hlawh tak JJ Gabriel-a beng a chhut a ngai hle. Kum 14 a nih aṭanga first team nena lo train tawh Gabriel hi first team match-a chhawr a la nih rih loh avangin a lungawi chiah lo nia sawi a ni. Mahse taksa la ṭhanglian mek tan chuan inelna tak taka tumpuite ngaihsak lohva luh nghal ai chuan first team training hautak tak neihpui hi a ṭangkai zawk fe a ni.

United hian club dinhmun chhiat lai ber pawhin player naupang chher puitlin kawngah theihna sang tak an nei reng a. Kum 15 mi a nih laia first team thlalakah a tel phak kha beiseina lian tak an neih zia tarlanna a ni. Mahse Gabriel-a camp lam hian dawhtheihna an tlachham deuh niin a lang a, kum 16 mi lek tan Premier League khawvel chu a la na mah mah a ni. Tharum hmanga inbeihnaah tackle na tak pakhat chauh pawhin he rawlthar hmakhua hi a tichhe vek thei a, chuvang chuan first team training-ah chher puitlin phawt hi United ruahmanna fing tak a ni. Gabriel hian Mainoo-a hniakhnung hi zuiin, dawhthei takin a theihna hi chher hriam se a tana ṭha ber tur a ni ang.