Kumin nipui transfer bazar chhung khan Manchester United chuan an academy player ṭhenkhat chu loan-in an chhuah tir a, chung zingah chuan first team tana lo inlan tawh Dan Gore chu ngaihven hlawh pawl a ni. Season liam ta khan Rotherham Player of the Year chawimawina dawng hial khawpin a khel ṭha a, kumin hian Jack Wilshere-a enkawl Luton Town chu loan-in a zawm ta a ni.
Mahse, Luton tana an match hnuhnung berah Gore hi bench lamah dah a ni thung a, United loanee dang Jayce Fitzgerald erawhin Rotherham tan bul a ṭan ve thung. Luton Town hian tun season bul an ṭan fuh vak lo na a, mimal tak chuan Gore hi an starting lineup-ah a inlan deuh ziah ṭhin. Amaherawhchu khelmualah a langsar tawk lova, ball a chan pawhin thil thar leh fing taka khelh aiin a hlauhawm loh zawng (safe) hlir a thlang ṭhin a ni. Hetianga result ṭha an neih theih tak si lohah chuan manager Wilshere pawhin thlak danglam a ngai ta a ni.
EFL Trophy-a khualmuala Colchester an lenchilh ṭum khan Gore hi bench aṭangin a rawn inlan ta chauh a, match khat chauh thil ni mah se, a hmaa bul ṭan ziah ṭhin tan chuan dinhmun tlakhniamna a tling. He inkhel hi Luton tan match pawimawh ber a ni lo chungin, an match lehpek chu October 10 daiha a la nih avangin player inthlak kual chiam a ṭul lem lo a. Minute 20 chhung a rawn inlan khan Gore hian Wilshere-a thutlukna siam chu a ti dik lo a ni tih hmuhtir theihna a nei meuh lo a, bul ṭan leh thei tur chuan khelmualah theihna a phochhuah nawn leh a ngai dawn a ni.
Chutih laiin, Rotherham tana loan-a khel United rawlthar Jayce Fitzgerald erawh chuan Exeter an hmachhawn ṭumin a vawikhat nan bul a ṭan ve thung a. Mahse defensive midfield-a minute 58 a khelh chhungin a talbuai hle a, Rotherham hi khualmualah 1-0 in an tlawm zui ta a ni. Fitzgerald hi khelmuala player che chhe ber (lowest-rated) zinga mi a ni a, ball vawi 22 chiah tawk hmanin pass hlawhtling 9 chauh a nei a, hetiang dinhmuna khel tan chuan beisei a phak lo hle. Senior football-a a vawikhat inlan tanna tur atan League One-ah loan-a a chhuak thei chu mi tam tak tan mak a ni a, a phu a ni tih pholang tur chuan hetiang khelh chhiatna hi a theihnghilh thuai a ngai dawn a ni.
Heng thil thlengte hian Manchester United academy chhuak rawltharte chu fan-ten an fak liam lutuk (overhyped) ṭhin tih a tarlang nawn leh a. Club tana an inmil dan chu thil pawimawh tak ni mah se, academy aṭanga 'wonderkids' tia sawite zingah Championship emaw a aia sang emaw-ah nghet taka inhmun rem zui thei an la awm lo hle. English league inelna hi hlawhtlinna tehfung awmchhun ni lo mah se, rawltharte'n hniak an rap hleithei lo hi ngaihtuahawm tak a ni.
Hei hian United head coach Michael Carrick tan zirlai pawimawh tak a pe a ni. Player pakhat theihnaah rinna a nghat a nih chuan, lower league-a chet bumboh paltir aiin first-team bul hnaia kawl a, train pui zui zel chu a ṭha zawk daih thei a ni. Entirnan, Jim Thwaites ang chi player chu lower league-a tha hmanga inbeih chiam ai chuan, top-level football khelh dan leh an thiamna nena inmil zawk a ni. Manager ṭhenkhat club lian enkawl chi an awm ang chiah hian, player ṭhenkhat pawh level sang zawka khelh tura ruat bik an awm a. Gore leh Fitzgerald te chu lower league chhungah paih luh an ni a, Thwaites ang player erawh Carrick-a'n uluk taka a humhalh a ngai thung a ni.
