Manchester United chuan Liverpool academy winger naupang Isaac Konde chu an lalut fel ta tih chanchinbu hrang hrang chuan an tarlang. Kum 16 mi Konde hi Old Trafford pan thar rawlthar theihna ngah takte zinga a hnuhnung ber a ni a, Manchester City aṭanga Karim Cassim an lakluh nemngheh a nih hnu lawkah he transfer hi a rawn thleng zui a ni.

Tun hnai season chhung hian United chuan kum eng emaw zat hnuah first team luhchhuah thei tur rawlthar ṭha ber berte ram chhung aṭanga lakkhawm hi an ngai pawimawh hle a. The Athletic-in a tarlan danin, Konde hian United nen hian kum khat daih scholarship contract an ziak phawt a, professional contract ziah theihna kum 17 a tlin veleh kum nga daih professional contract-ah a inthlak nghal dawn a ni.

Youth transfer kalphung pangngai angin, United hian Liverpool hnenah zangnadawmna (compensation fee) an pek a ngai dawn a. Club pahnihte hian a man zat tur chungchangah inbiakna an nei mek a, Liverpool lam chuan pound maktaduai chuang (seven-figure sum) an beisei niin hriat a ni. Inremna an nei thei lo a nih chuan, Premier League tribunal lamin United-in an elpui lian Liverpool hnena pawisa an pek tur zat hi an bithliahsak dawn a ni.

Konde hi kum 2018-a Under-9 a nih lai aṭanga Liverpool lo zawm tawh a ni a. Old Trafford a thlen hnu hian Darren Fletcher-a enkawl Under-18 squad a zawm nghal dawn a ni. He rawlthar hi transfer request thehluttu JJ Gabriel-a hmunruak luah theitu tura ngaih a ni bawk.

Hemi hma Ningani khan United chuan rawlthar dang Karim Cassim an lakluh thu pawh an lo nemnghet tawh a. Club official thuchhuah chuan, "Manchester United chuan rawlthar theihna ngah tak Karim Cassim chu kan lakluh theih nan inremna kan siam ta a ni. He England youth international hian Manchester City chhuahsanin min rawn zawm a. Kum 17 mi hian season liam ta khan FA Youth Cup nomawi latu City team-ah hmun pawimawh a luah a ni. Ram tan pawh central midfielder hian England Under-17 thleng a khel tawh bawk. Club-a mi zawng zawng hian Karim-a lo lawm chungin duhsakna sang ber kan hlan e," tiin an tarlang.

He midfielder hi thla liam taa Charlton nena Under-18 match an khelh ṭum khan United bench-ah a lo ṭhu tawh a, Manchester City aṭanga Old Trafford rawn pan thar David Eze-a hnungzui tu a ni bawk a ni.