Manchester United goalkeeper hlui David de Gea chuan, Premier League financial rule bawhchhiatna thubuai lian tham takah Manchester City chu thiam loh chantir an nih tak hnuin, Premier League title vawi engzat chiah nge a lak tawh tih a zawt fiam ta a ni.

Zirtawpni chawhnu khan Premier League chuan City hi kum 2009 leh 2018 inkar chhungin sum leh pai chungchanga league dan vawi 114 lai an bawhchhia tih hmuhchhuah a nih thu an puang a, hei hian football khawvel a ti-barakhaih hle. City lam hian engtik lai mahin dan an bawhchhiat loh thu sawi reng ṭhin mah se, tunah hian hremna eng nge an dawn dawn tih nghah an hmabak ta a, East Manchester club hian he thutlukna hi an appeal ngei tura ngaih a ni bawk.

He thubuai hi kum 2023 khan thehluh ṭan niin, thubuai ngaihtuahtu panel chuan City hian kum kua chhung zet dan an lo bawhchhia tih an nemnghet a. Hei vang hian City hian he hun chhunga an nomawi lo lak tawhte an chhuhsak dawn em tih zawhna a lian hle a ni. Chutiang thil chu a thleng a nih ngat chuan, De Gea ang chi player-te tan winners' medal pek theihna hun a inhawng thei dawn a ni. Tunah hian Italy club Fiorentina tana khel mek Spain goalkeeper De Gea hian, United-in pahnihna an hauh laia City-in an khum tak avangin 2012, 2018 leh 2021 khan Premier League title a lo chan tawh a ni.

Thil thleng chungchangah hian he shot-stopper hian social media platform X-ah thu tawi post-in, "A nih leh le…… Lo sawiho teh ang. Chuti a nih chuan Premier League title vawi engzat nge ka lo lak ve tawh reng reng a?" tiin a zawt a ni.

City thiam loh chantir an nih tak zelah hian, Premier League club dangte pawhin City lakah dan anga hma lak dan tur an ngaihtuah mek a. Dan an bawhchhiat hun chhung nia tarlanah hian City hian hlawhtlinna lian tak tak an chang a, English club dangte chuan sum lama an chan zozai lakah zangnadawmna (compensation) phut an tum niin a lang.

Kum 2011-12 season, final day-a United laka harsa taka title an lak aṭang khan City hian Premier League title vawi 8 lai an la hman a, domestic cup hrang hrang bakah Champions League nomawi vawi khat an chawi tawh bawk a, mahse chung an champion-nate chu tunah chuan rinhlelh a kai ta vek a ni.

The Athletic tarlan danin, he thil avanga tuartu club-te hi lungrual taka thawkhoin City lakah hian class-action lawsuit thehluh an rilruk maithei a ni. A bik takin Manchester United chuan an dinhmun leh sum lama City dan bawhchhiatnain anmahni a nghawng dan te chu an zirchiang mek a ni.

United tan hian 2011-12 season-a Sergio Aguero-a'n hun tawp dawna goal a khung avanga nomawi an chan kha an rilru tina ber a ni a, City-in record siama point 100 an hmuh ṭumah pawh khan United hi pahnihna an ni. Chu bakah Covid-19 hrilen laia mipui tel lova an khelh ṭum pawh khan United hi pahnihna bawk an ni leh a, hetianga title an lo chan tak avang hian prize money leh Club World Cup khelh theihna aṭanga sum luh tur tam tak an chan phah ngei a rinawm a ni.