Premier League-in sum leh pai kaihhnawih dan an zamte Manchester City-in an bawhchhiat avangin, independent commission chuan thubuai 115 awm zinga 114-ah City hi thiam loh a chantir a. Hemi vanga an sum hloh theih zat tur chu Manchester United chuan an club chhungrilah an lo chhut mek a ni. Commission hian City hremna tur hi an la puang lova, kum 2009 leh 2018 inkar thil thleng a nih avangin City pawh hian he thutlukna hi an khinglet (appeal) ngei tura ngaih a ni a, hremna engmah a la tla rih lo a ni.
The Athletic thuziak tarlangtu The Peoples Person-in a tarlan danin, Premier League club dangte ang bawkin United pawh hian City-a dan bawhchhiatna hian an sum dinhmun leh khelmuala an hlawhtlin theihna a khawih pawi dan chu uluk takin an zirchiang a ni. Kum kua (9) chhung huapa thil thleng zawng zawng chhut vek lovin, United-in nghawng a tawrh nat zual bikna season pathumte chu an ngaihtuah ber niin an sawi.
United transfer ruahmanna kalpui mekah sum hman dan uluk a ngaih zual lai a nih avangin, heng season-a an sum hloh theih zat chhut chhuah hi nakin zela an transfer ruahmanna tana thil pawimawh tak a ni thei a ni.
An ngaihtuah ber zinga season hmasa ber chu 2011-12 season kha a ni a. Khami ṭum khan Sir Alex Ferguson-a naute chuan goal difference vang liau liauin Premier League chanchina title inchuh hmuhnawm berah City hi an hneh lo a nih kha. A dawt leh chu kum ruk hnu, 2017-18 season a ni a. Hetah hian Jose Mourinho-a enkawl United chuan point 100 hmu khawp Pep Guardiola-a naute dawtah pahnihna an hauh a ni. Mourinho pawhin he season chungchang hi lo sawi fiam tawhin, City title an hlihsak a nih hlauh chuan medal leh bonus a tlai a khawhnuah a la dawn thei mai thei a ni tiin a lo sawi tawh ṭhin a ni.
An chhut tel dang leh chu 2016-17 season niin, hei hi Mourinho-a'n Old Trafford a pan hma chiah season a ni. Khami ṭum khan United chu pangana (5-na) niin Champions League an khel pha lo a, goal difference ṭha zawk neitu City chuan palina dinhmun hauhin Champions League an khel thung a ni. Team thar din chhoh mek laia Champions League khelh phak loh khan sum leh pai lamah nghawng lian tak a nei a, chuvang chuan zangnadawmna (compensation) phutna thlente a ngai a nih pawhin he season hi ngun taka chhut chian ngai hmasa ber tur a ni.
Hetianga an lo chhut chhin vang hian United hian zangnadawmna phutin dan ang thlapin lehkha an thehlut nghal tihna erawh a ni lo. City-in dan an bawhchhiat avang liau liauin heng season-ah hian United hian sum tam tak an hloh ngei a ni tih dan kengkawhtute hmaa nemngheh chu thil awlsam a ni lo a, commission thutlukna aṭanga a hranpa liau liaua kalpui ngai a ni.
Commission hian City hremna tur hi an la tichiang lova, City lamin appeal an thehluh hnuah thil a kal chho zel ang. Point paihsak nge an nih dawn, pawisa chawitir nge an nih dawn, tih erawh hriat theih a la ni rih lo. Amaherawhchu, Premier League club dangte ang bawkin United pawhin City laka thubuai awm mek hi thil nawi satliahah an ngai tawh lo tih chu a chiang hle a ni.
