Manchester United Women head coach Eva Olid chuan, West Ham United an hmachhawn hmain an forward Celin Bizet-i fitness chungchangah chanchin lawmawm a puang a. Nau a neih hnuah he forward hi beisei aia hmain a taksa a inbuatsaih chak hle a, amaherawhchu khelmuala a rawn inlan leh chiah hun tur erawh bithliah fel a la ni lo thung.

West Ham United nena league match an khelh hmaa pre-match press conference-ah, Olid chuan Bizet-i dinhmun hi a sawifiah a. Club performance department chuan a tirah chuan nau a neih hlim chhawn a nih avangin khelmuala a rawn luh leh hma hian hun rei zawk chawlh hahdamtir an lo ruahman lawk a ni. Mahse training-ah theih tawp a chhuah ṭha em em a, Carrington-a thawktute beisei phak bakin a taksa a inpeih chho chak ta a ni. Head coach chuan eng ni chiah nge a rawn inlan leh dawn tih sawi chiah lo mah se, a hma thei ang bera squad a rawn fin theih a beisei thu The Peoples Person chuan a tarlang.

United hian naktukah Progress with Unity Stadium-ah West Ham hi an mikhual dawn a, he inkhel hi Olid-i naute tana boruak ṭha siam chhunzawm zel nana hun pawimawh tak a ni dawn a ni.

Tun season an ṭan danah United hi an che sual deuh a, London City Lionesses leh Chelsea laka an tlawm avangin boruak a rit hman hle a nih kha. Mahse Emirates Stadium-ah Arsenal an lenchilh ṭumin an khel ṭha hle a, chak teuh hle mah se 1-1 in an inhnehtawk ta hram a ni.

Hemi hnu hian Players' Cup-ah Sheffield United chu 10-1 ngawt maia sawpin, Eva Olid-i hnuaiah an vawi khat nan hnehna an chang zui a. He hnehna ropui tak hian West Ham an mikhual hma hian player-te inrintawkna nasa tak a pe a, Olid-i attacking tactics kalpui dan pawh khelmualah a hlawhtling ṭan tih a pholang chiang hle a ni.

Bizet-i bakah hian Olid chuan squad chhung player dangte dinhmun pawh a sawi lang bawk. Ellen Wangerheim chu squad-ah a rawn tel leh theih tawh dawn thu a nemnghet a, hei hian an hun buai chho turah squad a ti chak sawt dawn a ni.

Chutih rualin Jayde Riviere leh Emma Watson te erawh squad-a tel thei turin hun an la mamawh deuh dawn a. Match ṭan hmain player-te dinhmun hi uluk taka enfiah a nih leh tur thu leh, chumi hnuah chauh chuan squad tawp tur thlan chhuah a nih tur thu Olid chuan a sawi bawk a ni.