Manchester United-in chan an phal loh ber leh an player pawimawh ber zinga mi chu an captain Bruno Fernandes hi a ni chiang mai a, mahse United nena contract thar chungchangah inremna an la neih fel theih loh avangin Europe club lian dangte chuan he Portuguese midfielder hi lakluh tumin an chang ran mek a ni.

Manchester United tana player pawimawh tawpkhawk Fernandes hian season liam ta khan Premier League chanchina season khata assist nei hnem ber record thar a lo siam tawh a. Tun season tharah United hian beisei angin bul ṭan chak tawk lo mah se, he club captain hian a theihna rawn pholang zui zelin tunah pawh inelna hrang hrangah goal li lai a khung leh tawh a, chung zingah chuan hat-trick pakhat khungin assist vawi khat a nei tawh bawk a ni.

Old Trafford club hian an captain hi chelh zui reng duh viau mah se, inremna thar an la siamfel theih rih loh avang hian Europe club lian dangte ngaihven a hlawh chho hle a, United hian an chan palh hlauh a nih chuan an squad tan channa lian tak a tling ngei ang.