Manchester United chuan season thar chu beiseina sang tak nen bul ṭan leh mah se, manager nghet thar Michael Carrick-a hnuaiah season bul an ṭan chhe leh ta hle.

Club legend Carrick hi caretaker anga United a lo enkawl laia squad ṭha tak a din theih zia leh hma a sawnpui theih zia a pholang tawh a, hemi hnu hian Old Trafford club hian permanent manager atan an ruat zui ta a ni. Mahse, permanent manager atana a ṭhut ngheh hnu thla khat lekah he manager naupang tak lakah hian pressure a sang chho nghal em em a, a ṭha lo zawngin record duhawm lo tak a siam chho mek a ni.

Nilaini khan League Cup-ah Manchester United chuan Brighton chu 3-2 in an hneh lo a. He inkhelah hian Red Devils lamin hma an hruai hman chungin a tawpah an tlawm zui ta a, hei hian Carrick-a chungchanga club chhungril boruak a ti rit zual hle a ni.

United co-owners INEOS chuan club legend Carrick-a ban chu thutlukna harsa leh khirh tak tur a ni tih an hria a, a rang lama thlak nghal ngawt chu thil duhthusam ber a nih loh rualin, dinhmun chhiat chhoh zel laka an inbuatsaihna atan a thlaktu turte chungchangah 'due diligence' an nei ṭan ta a ni.

Carrick-a hmunruak luah thei tur candidate ngaihven zual zingah Chelsea manager hlui Antonio Conte hming a rawn ri thar leh a. United hian Carrick-a ruahmanna titawpa project thar duan an thlang a nih chuan, Premier League-a lo che ṭha tawh Conte hi an lakluh duh berte zinga mi a ni dawn a ni.

Thla hnih liam ta chhung khan Michael Carrick-a thlaktu tur chungchang hi Old Trafford huang chhungah sawi a hlawh chho hle a, manager hrang hrang nen sawizawm an lo ni tawh bawk. Amaherawhchu, Carrick-a dinhmun hi a la tawp hlen mai lo a, Middlesbrough boss hlui hian an tlahniam mek chu a vawrh kâng leh thei dawn nge, INEOS hian manager thar an rawn lalut dawn tih chu khelmuala an chet zui dan turin a hril ang.