Old Trafford-a Tottenham nen 1-1 a an inhnehtawk ṭuma hun tawp lama Spurs siphurh sut theih danah, Liverpool defender hlui leh football pundit Jamie Carragher chuan Manchester United player pahnih Bryan Mbeumo leh Carlos Baleba te chu a kawk ta tlat mai. He Premier League inkhelah hian Mbeumo chuan United tan hmahruaina goal khung mah se, stoppage time-ah Dominic Solanke chuan Spurs tan tauh lutin point khat an insem ta a nih kha.
He inkhelah hian United hi a tlangpuiin an khel ṭha tawk lo hle a. Mbeumo-a goal khung hnu lawkah Tottenham midfielder Rodrigo Bentancur chu red card hmuin hnawhchhuah ni mah se, thla khat chuang hnuah an vawi khat nan league match-a chak tur anga ngaih Michael Carrick-a naute hian mi pakhat an tam zawk hnuah harsatna an tawk zual hlauh a ni.
Roberto De Zerbi-a enkawl Tottenham hian ball per (second balls) an chang zui nasa hle a, Solanke-a goal khung theihna tura an inbuatsaih danah khan hei hi a lang chiang hle. Carragher-a thin tirim zualtu chu ball chang tur dinhmun ṭha zawka ding chunga Mbeumo leh Baleba ten Spurs midfielder Mateus Fernandes chu ball an chhuh luihtir kha a ni.
Sky Sports-a a sawinaah Carragher chuan, "Cunha-a chetzia (body language) kha a inpeih em? Peih lo. Savio khan player pahnih a pel a, en ta che u heta Archie Gray-a hmunawl neih nasat zia hi, box chhungah ball an khawih nawn leh a. A tawp bera an chet dan phei kha chu pawmzam theih loh a ni," a ti.
Carragher chuan sawi zuiin, "Baleba leh Mbeumo te lakah khan Fernandes khan ball a khawih hmasak theihna chhan tur a awm lo hrim hrim. Vawi li, vawi nga ngawt Tottenham player-te'n ball an chang hmasa ziah a, chumi rualin he team hi chawlhkar thum kalta khan an thawkrim tawk lo tia sawisel hlawh kha an ni tih theihnghilh suh u. Minute tlemte chauh khelh tur awm tawh laia 1-0 a hma hruai chung siin, Tottenham zawk khan chak an duh zawk a ni. Match tawp lamah chauh a ni lo, inkhelh ṭan aṭang rengin an ni zawk an phur. Fernandes-a'n ball per a chang leh thei kha chu a pawm theih loh a ni," a ti bawk.
"Tottenham chuan box chhungah ball an vawrh lut mawlh mawlh a, tute nge a per la hmasa? Tottenham bawk. Chumi hnuah ball dang a lo lut leh a, tun season ṭan aṭanga che ṭha lo em em Martinez khan a aia ṭhain lo dang tur a ni a, Solanke-a pet luh kha a ṭha hle bawk. Season a la thar viau na a, Manchester United manager hrang hrang hnuaiah hetiang dinhmun hi kan lo hmu fo tawh. Khelmualah taksa leh rilru lamah an inpeih tawk em tih chu zawhna lian tak a ni mek a ni," a ti zui.
Carragher chuan United coach Carrick chu vaukhannain, "Tunah hian match lian pathum hmachhawn tur an nei a, Champions League khualmual match hnih leh Leeds an hmachhawn dawn. Rang taka an game khelh san zawng (intensity) an tihsan vat loh chuan thil a buai nuai thei ang," a ti. Heng Champions League match pahnihte hi Atletico Madrid leh Como lakah an khelh dawn bakah, Leeds lakah khualmualah an inlan dawn a ni.
He result vanga sawiselna tawk Carrick chuan Atletico Madrid an hmachhawn hmaa press conference-ah a player-te fuihin: "Thil a kal tluan loh chang hian boruak ka ngaina ṭhin, tu nge squad chhungah hian awm tak tak a, tu nge hun rei tak cham duh tih a langchhuak ṭhin a ni. Tute nge club tana inpe tak tak tih a hriat theih a. Fan-te an awm reng a, hlawhtlinna an duh em em avangin keini pawhin thil ṭha kan hlan a ngai a ni. I tum ram thleng tur chuan chona hi i pawm thiam a ngai a, chu chu kan paltlang theih ngei ka ring bawk," tiin a sawi.
